बेकार ?…

भांगरभूंय | प्रतिनिधी

सांजवेळच्या चार वरार तकलेक तांबडो लेंस आनी कमरेक पाचव्या कोराचो वालो गुठलावन पन्नास ते साठ पिरायेचे “जुवान” धोल तासो घेवन माचयेर चडले.

“पुरो आतां. चड जालें ;” “बेकरांची शक्त” “लाल सलाम ते- हे राम” ह्या सगल्या संस्थांनी “चलो राजधानी” म्हणींत राज्यांतल्या बेकार जुवानांक उलो मारलो. लोकहिता आड चलयिल्ल्या सरकाराच्या कर्तुबां आनी बेकारीचेर भौशीक आक्षेप उक्तावप ही जमातींची फाटली येवजण आशिल्ली. गांव-गांवांतल्यान बेकार जुवानांक पुंजावन हाडप आनी परत धाडप सोंपें नाशिल्लें. हाची जापसालदारकी “गोंय राखुया- फुडें वचुया” ह्या बिगर राजकी संस्थेन घेतिल्ली. गोंय, गोंयकार आनी गोंयचे नीज बेकार हांच्या हक्का पासत ही संस्था फाटलीं कितलींशींच वर्सा सावन काम करता. बस, टेम्पो, टॅक्सी, आनी हेर येरदारीच्या वाहनांची पुरवण करपी “बनसल ट्रान्सपोर्ट” कंपनी ह्या संस्थेची साप्प लागींची. वाहनांनी लोकांक राजधानींत हाडप आनी परत पावोवप हो कॉत्राद ह्या कंपनीन घेतलो. श्री. धनराज बनसल ह्या कंपनीचो सर्वेसर्वा. भारत देशाचे नागरिकत्व सोडून पुर्तुगाली नागरीक जावन “लंडोन” गेल्ल्या चडश्या लंडन-गोंयकारांनी आपल्यो बसी, टॅक्सी आनी टेम्पो श्री. धनराजाच्या कंपनी लागीं “भाड्या कोंतार” चलोवंक दिल्यात. तांचो रंग, नांव बदल नासतना तो ही सगलीं वाहनां गोंयच्या वाठारांनी चलयता.
बेकार जुवानांचे फुडारपण करपी चडशे फुडारी पासश्ट तें सत्तर वर्सा मायज पिरायेचे. सरकारांतल्याच काय असमाधानी आमदारांनी हे बसकेक आधार दिल्लो. जमातीच्या फुडाऱ्यांक आनी मुखेल उलपोवप्यांक आपल्यो पंच तारांकींत हॉटेलांनी संलग्न आशिल्ल्यो वातानुकुलींत टॅक्सी वापरूंक दिल्यो. आपणाक निधर्मी, विचारवंत म्हणून घेवपी “करोडपती समाजवादी” एका धंदेकारान एकठांयिल्ल्या जुवानांक पिवपाच्या उदकाच्या बोंतलींची पुरवण केली. आपणाक विरोधी पक्षाची तिकेट मेळपाच्या आशेर ताणें ही जापसालदारकी व्हड उक्त्या मनान मान्य केल्ली. हाजी मुल्ला मूळ कर्नाटक भटकळ ह्या गांवचो. फाटलीं कितलींशींच वर्सां तो गोंयांत आपल्यो दोन बायलो आनी स भुरग्यांक घेवन, सरकारी हावसिंग बोर्डाचे मेकळे सुवातेर उबारिल्ल्या खोंपींत राबित्याक आसा. ताची फामील धर्मीक तोपया वांगडा हेर मोसमी वा ऑर्डरी नुसार तोपयो तयार करता. “आमी बेकार नाका आमकां हें सरकार” अशें घोश वाक्य छापिल्ल्यो धव्यो फुल्ल तोपयो जगनभाय पारेख हांणी पुरस्कृर्त केल्यो. गोंयभर चलपी ताच्या मटक्या अड्ड्यार हालींच गोंय पुलिसांनी धाडी मारिल्ल्याचो ताचो राग निवळूंक नाशिल्लो. मटको हो खरो बेकारांचो प्रामाणीक येणावळीचो धंदो अशें ताचे म्हणणें !
बसी, टॅक्सी, टेम्पो ह्या सगल्या वाहनांचो कारभार सांबाळप ही सोंपी गजाल न्हय. तातूंत त्यो विंगड विंगड लोकांच्या मालकीच्यो आसत तर जापसालदारकी वाडीक लागता. सगली भौशीक येरादारीची वाहनां गोंयभर घोळोवंक आरटीओ, पुलीस खातें आनी सरकारी खात्यांतल्या सरकारी नोकरांक सदांच “धादोशी” दवरचें पडटा. मोठी करामत करची पडटा, हें धनराज बनसल जाणां आशिल्लो. बरीच वर्सां आदीं ताच्या आवय बापायन राजस्थान मारवडांतल्यान गोंया येवन वसणूक केल्ली. आपलो जल्म गोंयां मडगांव हॉस्पिसियोंत जाल्लो म्हूण धनराज आपणाक नीज गोंयकार मानता. गोंय राखुया- फुडें वचुया संस्थेचो तो एक वांगडी. संस्थेचो मुखेल ताका आरटीओ, पुलीस आनी हेर सगल्या गजालींची जतनाय घेवंक आधार दिता. आपणाक खरें मूळ गोंयकार म्हणून घेवपी बेकार जुवानांच्या उत्तेजक सभावाचो बनसल बारीकसाणेन अभ्यास केला. ह्याच पासत ताणें बिहार, झारखंड, बंगाल, युपी हांगासरल्या जुवानांक आपणाल्या कंपनीत कामाक दवरल्यात. ते सगले ताच्या आज्ञे भायर वचनात. बेकारसाण आनी गरिबीचो अणभव तांणी आपल्या गांवात साप्प लागीं सावन अणभवला. गोंय तांका स्वर्गा परस उणो नाशिल्लो. गोंयांत काम मेळ्ळे उपरांत तांणी आपल्या गांवच्या हेर लोकांक लेगीत हांगा हाडले. आयज तें सगले विंगड विंगड कामधंदो करून आपलें पोट भरतात. कोणूच बेकार रावना.
मारियान ग्रासीयेस आपल्या पुराय फामील सयत लंडन शिफ्ट जावचे आदीं ताणें आपलो बंगलो, फाटली चाळ आनी सरभोंवतणची सुवात विकूंक काडिल्ली. धनराज बनसलान तो बंगलो, चाळ आनी हेर मेकळी सुवात मेळून सुमार 2500 स्क्वेर मेत्र जागो मारियानाक बरेच मोल दिवन विकतो घेतिल्लो. आयज थंय तो, काम करपी कर्मचारी आनी तांचे वांगडी एकठांय रावतात.
जमातीचो दीस उदेलो. मारिल्ल्या उल्याक आपली पिराय, जात-कात, लींग, रंग भेस सगल्यो भौशीक आडमेळींक मोडो घालून बेकार गोंयकार जुवान “स्वतंत्र मैदानार” जमले. जमिल्ल्या मदीं “रीळकरी”, ब्रेक्रींग न्यूज वाले, पुलीस, धर्मगुरु, माद्री, स्वगुरु, आस्तीक, नास्तीक अशें सगले मेळून हजार मायज लोक जमले. जमिल्ल्यांनी घाल्ल्या धव्या कोरांच्या तोपयां पासत कुळेंच्या दुदसागराचो एक प्रवाह शारांत व्हांवत आयला कशें दिसतालें. सांजवेळच्या चार वरार तकलेक तांबडो लेंस आनी कमरेक पाचव्या कोराचो वालो गुठलावन पन्नास ते साठ पिरायेचे “जुवान” धोल तासो घेवन माचयेर चडले. तातूंतलें चडशे आरंभ शूर म्हूण फामाद. हांणी वांटो घेतिल्ली खंयचीच आंदोलनां तर्कीक नदरेन आयज मेरेन येसस्वी जावंक नात. चडशे सरकार विरोधी चळवळ चलोवप्याच्या “पी-रोला” (पे-रोल न्हय) वेले. गळ्यांच्यो शिरो ताणून तांणी पदयेवंक सुरू केलें. पदांतलीं सगलीं उतरां जरी सारकी कळनाशिल्ली तरी कोरसांतली “आमी बेकार नाका आमकां हें सरकार’ उतरां मात स्पश्ट कळटाली.
आयच्या जमातीचो मुखेल सोयरो निवृत आय.ये.यस. अधिकारी अशोक काटकार. ताची पिराय सत्तरी लागींची. ताचो पूत आनी सून कांमधंद्या पासत मुंबय राबित्याक आसतात. हातांतले बडयेचो आधार घेत तो माचयेर आयलो. वांगडा विंगड विंगड कोराचे भेस आनी केस केल्लीं बायलां आयलीं. जुवान दिसचे म्हूण तांणी केल्ले यत्न तांच्या भेसांतल्यान आनी केंसांतल्यान नदरेंत भरताले. सरकार नोकरी दिवंक कशें अपेशी थारलां, धरून जातीवाद, भ्रश्टाचार, गोंय गोंयकार, हे विशीं इंग्लेज, पुर्तुगेज, मराठी मिसतूर कोंकणी भाशेंतल्यान भाशणां जालीं. जुवानांनी ताळयो आनी गाळयो, जय जयकार आनी धिक्कारान सगलो वाठार गाजोवन सोडलो. मोठ्या मोठ्यांनी सरकार विरोधी घोशणां दितना जुवानांनी रिकाम्यो प्लास्टीक बोतली एकामेकार आपटींत ठेको धरून कांतारां गायलीं. बेकरांक नोकरी कशी आनी खंय मेळूं येता, हे विशींची मात कोणेच एक उतर लेगीत काडलें ना. सांजवेळां सात मेरेन जमात सोंपली.
धनराज बनसालान आपल्या बंगल्या फाटल्या चाळींत आयज खाशेल्या जेवणावळीचें आयोजन केल्लें. “बेकार गोंयच्या जुवानांक” जमातीक व्हरपी ताच्या बसींचे बिहारी ड्रायवर, जमाती दीस जमिल्ल्यांक वडापाव आनी भेळ विकपी धरमपाल यादव आनी ताचे सांगाती, मैदानार सांडिल्ल्यो रित्यो प्लास्टीक बाटली, तोपयो एकठांय करून तांचे भंगार विकपी पप्पू आनी सांगाती सगले आयज उमेदीन हांगासर जमिल्ले. तांणी सगल्यांनी खाशेले “युपी-बिहार स्टायल” मटण रांदिल्लें. जमाती निमतान त्या दिसाच्या जोडींतले काय जोड तांणी आपआपल्या घरा धाडिल्ली. ते राती गोंयचो “तो” वाठार युपी-बिहार मसल्याच्या परमळान भरिल्लो. सगल्यांनी त्या खाशेल्या जेवणावळींचेर ताव मारलो. मात आड पडच्या वगतार गोंयच्या बेकार जुवानांक आनी जमातींच्या मुखेल्यांक मना काळजांतल्यान देव बरें करूं म्हणूंक ते विसरले नात.

दादा हेगडे
9518942298