भांगरभूंय | प्रतिनिधी
सरपंच अमीत सावंतः आश्वें मांद्र्यां दर्यादेगे वयल्या बांदकामांची पळोवणी
भांगरभूंय । प्रतिनिधी
पेडणें: मांद्रें पंचायत वाठारांतल्या आश्वें मांद्रेंच्या आजोबा मंदीर वाठारांत सीआरझॅड नेम मोडून हंगामी स्वरुपाचें बांदकाम करचे खातीर घेतिल्ल्या परवान्यांचो व्हड प्रमाणांत गैरवापर केला. ह्या परवान्यांच्या आदारान पक्कीं बांदकामां ते भायर अतिरिक्त 15 बेकायदो बांदकामां करून आवांताद कॉटेजीस, तातूंत काँक्रीट- लोखंडाचो वापर केला. मांद्रें पंचायत मंडळान तांकां नेम आनी अटी घालून हंगामी कॉटेजीस, खोपींक परवाने दिल्ले. ते परवाने फाटीं घेतले उपरांत फाटल्या सात दिसां आदींच परतून एक लेखी नोटीस जारी करून ह्या पुराय बांदकामांचो पंचनामो करतले, अशें कळयिल्लें. ते प्रमाण 5 डिसेंबराक पंचायत मंडळान ह्या बांदकामाची पळोवणी केली.
हीं बांदकामां करतना कशे तरेन सीआरझॅड नेम मोडल्यात, ताचो पुराय अहवाल पेडणें उपजिल्होधिकारी, उत्तर गोंय जिल्होधिकारी, सीआरझॅड विभाग हांकां दितले. पंचायत राज कायद्या प्रमाण जे अधिकारी पंचायतीक आसात, त्याच आदारान ही बांदकामां मोडपा मेरेन कारवाय करतले, अशी शिटकावणी सरपंच अॅड. अमीत सावंत हांणी दिली.
आश्वें मांद्र्यां जंय आजोबाचें देवूळ आसा तें देवूळ आनी देवाचें खडप कितल्याशाच वर्सां सावन दर्यादेग वाठारांत आसा. त्या वाठारांतूय अतिक्रमण करून ह्या वेवसायिकांनी व्हड प्रमाणांत सीआरझॅड नेम मोडून बांदकामां केल्ल्याचें नदरेक येताच मांद्रें पंचायतीन धांवपळ केल्या.
सरपंच अॅड. सावंत हांणी थळाव्या पत्रकारां कडेन उलयतना सांगलें, आदीं देवळा मेरेन वचपा खातीर परंपरीक पांयवाट आशिल्ली, तिचो भौशीक बांदकाम खातें रस्तो विभाग आनी मांद्रें पंचायतीन मेळून देवळा मेरेन पक्को रस्तो केल्लो. बेकायदो बांदकाम केल्ल्या वेवसायिकान तो रस्तोय अर्द्या परस अदीक आडोवपाचो यत्न केला. हंगामी स्वरुपाचें बांदकाम करपा खातीर दिल्ल्या परवान्याचो गैरवापर केला. ताचो पंचनामो केला आनी ताचो अहवाल संबंदीत अधिकाऱ्यांक दितले. ते भायर आयचे आयज नोटीस जारी करून चलिल्लें बांदकाम बंद करपाक सांगलां. ताची प्रत पुलिशेक धाडल्या आनी ह्या वाठारांत कामयस्वरुपी पुलिसांची नेमणूक करून सीआरझॅड वाठारांत बेकायदो बांदकाम जावचें ना, हाची जतनाय घेवची अशें कळयलां. आतां पुलिसांनी हाचेर नदर दवरची, अशें सरपंचान सांगलें. बेकायदो बांदकामांची पळोवणी करतना पंचायत सचीव कामत, उपसरपंच तारा हडफडकार, पंच किरण सावंत, प्रशांत नायक, चेतना पेडणेंकार, रॉबर्ट फर्नांडीस, मिंगेस फर्नांडीस, राजेश मांद्रेंकार हाजीर आशिल्ले.
परवान्यांचो गैरवापर
संबंदीत वेवसायिकान परवानो नासतना व्हड प्रमाणांत काँक्रीट आनी लोखंडाचो वापर करून जे पद्दतीन बांदकामां केल्यांत, तेच पद्दतीन स्विमींग पूल लेगीत बांदला. ह्या बांदकामांक थळावे पंचायतीन कसलेच परवाने दिवंक नाशिल्ले. तेचवरीं सीआरझॅड विभागान हंगामी स्वरुपाच्यो खोपी घालपा खातीर दिल्ल्या परवान्यांचोय गैरवापर केल्ल्याचें, पळोवणेंत स्पश्ट जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.