भांगरभूंय | प्रतिनिधी
रोहन खंवटेः पर्यटन वेवसायांतल्या दलालांनी गोंयचें नांव पेड्डेर केलां
भांगरभूंय । प्रतिनिधी
मडगांवः बेकायदो टुरिझम गायडांक आपलो कायम विरोध आसतलो. आपूण वॉटर स्पोर्टस् वेवसायाच्या विरोधांत ना. तेच वांगडा तांचो वेवसाय वाडचो, अशें आपल्याकूय दिसता. जीईएलाक लागून वॉटर स्पोर्टस् तंत्रज्ञानाचो फायदो जातलो, अशें पर्यटन मंत्री रोहन खंवटे हांणी सांगलें. मडगांवां जाल्ले प्रशासन तुमच्या दारांत कार्यावळींत ते उलयताले.
ह्या वेळार नावेलीचे आमदार उल्हास तुयेंकार, आमदार आलेक्स सिक्वेरा, आमदार आलेक्स रेजिनाल्ड, नगराध्यक्ष दामोदर शिरोडकार हाजीर आशिल्ले. जीईएल कंपनी कसलोच ताबो घेवचे नात. कांय आमदार लोकांची दिशाभूल करपाचो यत्न करतात. ते वॉटर स्पोर्टस् ऑपरेटरांक भिरांत दाखयतात, मात तांणी भिवपाची गरज ना. पर्यटन वेवसायांत दलाल खूब आसात. तांणी गोंयचें नांव पेड्डेर केलां. अशा दलालांच्या विरोधांत कारवाय करतले. गोंयांत पुलीस खात्यांत कर्मचाऱ्यांचो उणाव आसा. हे बाबतींत सरकार रोखडीच कार्यवाही करतले, अशें खंवटे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
