भांगरभूंय | प्रतिनिधी
फोंडें, प्रतिनिधी ः नंद्रण- मोलेंच्या रानांतल्यान सोरो व्हरपी चवगांक काल रातीं कुळें पुलिसांनी ताब्यात घेतले. तांचे कडल्यान दोन दुचाकी आनी 1.20 लाखांचो सोरो जप्त केला. ताब्यांत घेतिल्ल्या मदीं प्रकाश देवाप्पा हनाबर (19), अशोक देवाप्पा हनाबर (19), नागेश अशोक वडार (19) आनी बोडप्पा नारायण हनाबर (27) चवगूय रावपी तीनय घांट- कर्नाटक हांचो आस्पाव आसा. जप्त केल्लो सोरो सांग्या अबकारी खात्याच्या अधिकाऱ्या कडेन दिला.
कुळें पुलिसांनी दिल्ले म्हायती प्रमाण, शुक्रारा रातीं सुमार णव वरांचेर गस्त घालपी पुलिसांक रानांतल्यान कर्नाटका वटेन वचपी दोन दुचाकी दिसल्यो. पुलिसांनी दुचाकी वयल्या 4 जाणांची तपासणी केली तेन्ना तांचे कडेन सोऱ्याचो बेकायदेशीर सांठो मेळ्ळो. सुमार 85 सोऱ्याच्यो बाटल्यो तांचे कडेन मेळ्ळ्यो. पुलिसांनी केए- 65- जे- 1262 आनी केए- 65- एच- 9418 क्रमांकाच्यो दुचाकी जप्त केल्यात. जप्त केल्लो सोरो आनी अटक केल्ल्या चवगांक कुळें पुलिसांनी सांग्या अबकारी खात्याच्या ताब्यांत दिला. निरिक्षक सगुण सावंत हांच्या मार्गदर्शना खाला सहाय्यक उपनिरिक्षक सुमन गांवकार हांणी पंचनामो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
