भांगरभूंय | प्रतिनिधी
पणजी ः राज्यांत बेकायदेशीर होर्डिंगाचेर कारवाय चालू आसा. बेकायदेशीर मिनी कॅसिनो एका वर्सा भितर बंद करतले. तशेंच एका वर्सा भितर 349 कोटी रुपयांची येणावळ मेळना जाल्यार तांची मालमत्ता जप्त करतले अशें उतर मुख्यमंत्री डॉ. प्रमोद सावंत हांणी मंगळारा विधानसभेंत उलयतना दिलें.
आमदार विजय सरदेसाय हांणी हे संबंदी प्रस्न विचारिल्लो. हेर देशांनी चलपी कॅसिनोंच्यो जायराती गोंयांत करतात. हे विशीं गोवा फॉरवर्ड पक्षान पुलिसां कडेन कागाळ केल्ली. पूण, पुलिसांनी कसलीच कारवाय करूंक ना. दुसरे वटेन राज्यभर मिनी कॅसिनो चलतात. ते फकत विधानसभा अधिवेशनांच्या वेळार बंद आसतात. तो बंद करपाचे जायते यत्न केले. पूण, तातूंत आमकां यश मेळूंक ना. राज्यांतल्या तरणाट्या पिळगेक हाचो व्हडलो फटको बसता, असो दावो आमदार सरदेसाय हांणी केलो. ते भायर जमनी वयल्या कॅसिनो कंपनींनी कोविड काळांत नूतनीकरण शुल्क भरपा खातीर वेळ वाडोवपाची मागणी केल्ली. तांचे कडल्यान 349 कोटी रुपयांची येणावळ येवपाची आसा. ती केन्ना आनी कशीं मेळटली असोय प्रस्न तांणी मुख्यमंत्र्याक केलो.
हे विशीं उलयतना मुख्यमंत्र्यान सांगलें, राज्याचें जायरात धोरण अजून तयार जावंक ना. पूण, येणावळ मेळना अशा जायरातींक केन्नाच परवानगी दिवचे नात. सध्या बेकायदेशीर रितीन उबारिल्ल्या जायरात होर्डिंगाचेर गृह खातें कारवाय करता अशें तांणी सांगलें. बेकायदेशीर मिनी कॅसिनो एका वर्सा भितर पुरायपणान बंद जातले. जमनी वयल्या कॅसिनोंतल्यान येणावळ येवपाची आसा ती एका वर्सात वसूल करतले. आमदार आलेक्स रेजिनाल्ड, एल्टन डिकोस्ता हांणी बेकायदेशीर कॅसिनो बंद करपाची मागणी मुख्यमंत्र्या कडेन केल्या.
उत्तर गोंयच्या जायत्या वाठारांनी मिनी कॅसिनो गुप्तपणान चलतात. थंय तांकां 100, 200 रुपयांत खेळपाक मेळटा ताका लागून थंय वचपी नेण्ट्यां भुरग्यांचो, तरणाट्यांचो आंकडो वाडत आसा. ते खातीर अशे तरेचे कॅसिनो बेगोबेग बंद करपाची मागणी आमदार डिलायला लोबो हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
