भांगरभूंय | प्रतिनिधी
भारतान चेन्नयांत खेळिल्ले तिसरे आनी निमाणे निर्णायक एक दिसाचे क्रिकेट मॅचींत ऑस्ट्रेलिये कडेन हार खाली. प्रत्यक्ष टेस्ट मॅच माळ जिखले उपरांत भारत एक दिसाचे मॅचींची माळूय सोंपेंपणान जिखतलो, असो विस्वास क्रिकेटमोगींक आशिल्लो, पूण खंयचे कडेन कांय ना.
हय, हे मालिकेंत भारतीय पंगडान सारकी अशी कामगिरी केली ना. हे माळेच्या तिनूय मॅचींनी भारतीय पंगडा कडल्यान जे कामगिरीची अपेक्षा आशिल्ली तशी जावंक ना. खरें म्हणल्यार भारतीय पंगड एक दिसाचे माळेंत पयल्या क्रमांकाचेर आशिल्लो. पयल्या क्रमांकाच्या पंगडान सकयल्या क्रमांकाच्या पंगडा भशेन कामगिरी केली. बॅटिंग, बाॅलिंग आनी फिल्डिंग ह्या तिनूय आघाडींचेर भारतीय पंगडान निराश करपी कामगिरी केली, खास करून बॅट्समनांचें अपेस हें हे माळेंतले हारीचें मुखेल कारण.
तिनूय मॅचींनी भारतीय बॅट्समनांनी माती खाल्ली. पयले मॅचींत भारतीय बाॅलरांनी ऑस्ट्रेलियन पंगडाक फक्त 179 धांवड्यांचेर आडावन अजापीत करपी काम केलें. पूण, भारतीय बॅट्समन हें लक्ष्य पुराय करपाक अपेशी थारले. के एल राहुल आनी रवींद्र जडेजा बारीकसाणीन खेळिल्ल्यान भारतान ह्या आव्हानाचेर मात करून माळेंत जैतिवंत आघाडी घेतली, पूण दुसरे मॅचींत भारतीय बॅटिंगेन अक्षरशः दिमी मारली. भारतीय बॅट्समन मिशेल स्टार्काचे बाॅलिंगेक शरण गेले. हे मॅचींत भारतान शेंकडो कसोबसो हुपलो, पूण पंगड फक्त 117 धांवड्यो करून कोसळ्ळो. ऑस्ट्रेलियन पंगडान एकूय विकेट हारनासतना फक्त 66 बॉलांनी ही मॅच जिखून माळेंत बरोबरी केली.
तिसरे आनी निर्णायक मॅचींतय भारतीय बाॅलरांनी ऑस्ट्रेलियेक 269 धांवड्यांचेर आडायली. बरें काम केलें, पूण बॅट्समनांक हें लक्ष्य दोंगर सारकें दिसलें. एका फाटल्यान एक भारतीय बॅट्समन हाजेरी लावन परतून तंबूंत येवपाक लागले. ऑस्ट्रेलियेचे फास्ट बाॅलर आनी स्पिनर आमच्या बॅट्समनांचेर शेक गाजयताले. विराट कोहली आनी के एल राहुल हांणी 69 धांवड्यांची भागीदारी केली, पूण ते आवट जाले उपरांत भारताची हार निश्चीत आशिल्ली.
बॅट्समनांनी पुराय माळेंत निराश करपी कामगिरी केली. भारताचो कॅप्टन रोहित आनी शुबमन गिल हांची सुरवात बरी जाली, पूण दोगूय चाळिसा उपरांत भायर पडले. विराटान निमाणे मॅचींत अर्दशेंकडो केलो, पूण पयल्या दोन मॅचींनी तो अपेशी थारलो. के एल राहुलाची खात्री ना. एके मॅचींत अर्द शेंकडो केले उपरांत फुडल्या धा मॅचींनी दोट्टी आंकडे लेगीत ताका हुपपाक जमूंकना. भारतीय बॅट्समनां मदीं टी-20 मॅचीचो स्टार खेळगडो सूर्यकुमार यादव सगळ्यांत चड अपेसी थारला. यादव हो टी- 20 खेळांतलो संवसारांतलो सगळ्यांत बरो बॅट्समन, पूण एका दिसाचे मॅचींनी तो अजूनय अपेशी आसा. ताका अजून फॉर्म मेळूंक ना. हे माळेंत ताका तिनूय मॅचींनी तांतीं लेगीत फोडूंक मेळ्ळें ना. ताचे सारको विस्वासू बॅट्समन सातत्यान धांवड्यो करपांत अपेशी थारता, ही हुस्को करपा सारकी गजाल. ही मालिका हारून भारतान एक दिसाचे मॅचींनी पयली सुवात सोडलीच, पूण ताचे वांगडाच आतां जायते प्रस्न उप्रासल्यात.
अंदूं सप्टेंबर आनी ऑक्टोबरांत वन डे विश्वचषक सर्त जातली. मजेची गजाल म्हळ्यार ही सर्त भारतांत जातली. भारतीय पंगडाची असलीच कामगिरी चालू उरली जाल्यार भारत विश्वचषक कसो जिखतलो? भारता खातीर हो वेक अप काॅल. भारतीय पंगडान हे हारीचेर चिंतन करून आपल्या खेळांतले उणाव काडून उडोवचे. अजून स म्हयने उरल्यात. तातूंत भारतीय बॅट्समनांनी आपल्या खेळांतल्यो चुको सुदारले नात जाल्यार विश्वचषक जिखपाचें सपन हें सपनूच उरतलें.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
