भांगरभूंय | प्रतिनिधी
न्युझिलॅण्डाचो आक्रमक ओपनर बॅट्समन ब्रॅण्डन मॅकुलम 12 मे 2022त इंग्लंडाच्या राष्ट्रीय पंगडाचो मुखेल प्रशिक्षक जाल्या उपरांत पंगडा खातीर बॅझबॉल रणनिती आपणायली.
इंग्लंड टॅस्ट क्रिकेट लेगीत टी-20 भशेन आक्रमक खेळ करपाक लागिल्लो. आक्रमक बॅटींग, आक्रमक बॉलींग, आक्रमक प्लॅनींग, सगलेंच आक्रमक. मे 2022 वर्सा सावन इंग्लंडान आक्रमक खेळ करून 18तल्यो 13 मॅची जिखल्ल्या. हीच रणनिती घेवन ते भारतांत आयिल्ले. भारता आड हैदराबादांत जाल्ली पयली टॅस्ट जिखिल्ली. पूण, ते उपरांत ही रणनिती तांच्या म्हारग पडली. ते सेगीत दोन मॅची हारून पांच मॅचींचे माळेंत 1-2 अशे फाटीं पडला.
इंग्लंडाचे आयल्ले मुखेली नासिर हुसैन आनी मायकल वॉन हांणी पंगडाचे रणनितीचेर टिका केल्या.
दरेक मॅचींत आक्रमक रणनिती येसस्वी थारपाक शकना. हाचेर प्रशिक्षक मॅकुलम आनी मुखेली बेन स्टोक्स हाणें विचार करपाक जाय अशें मायकल वॉन हाणें म्हणलां. नासिर हुसैनान लेगीत मायकल वॉनाक तेंको दिला.
चवथी मॅच 23 फेब्रुवारी सावन रांची शारांत सुरू जातली. बॅझबॉल रणनिती आपणायल्या उपरांत पयले खेपे इंग्लंडाचेर माळ वगडावपाची पाळी आयल्या. 2012-13 सावन घरच्या मैदानाचेर एकूय टॅस्ट माळ हारूंक नाशिल्ल्या भारताच्या जाळांत इंग्लंड घुस्पावपाक लागला. दरेक मॅचींत आक्रमक रणनितीन खेळपा बदला मॅचीचे स्थिती प्रमाण खेळ करपाची गरज आसा अशें कांय जाणकारांनी इंग्लंडाच्या पंगडाक सल्ले दिवपाक सुरवात केल्या.
राजकोटांत जाल्ले तिसरे मॅचींत भारतान 434 धांवड्यांनी व्हड जैत जोडिल्लें. भारतान दिल्ले 557 धांवड्यांचे मोखीचो फाटलाव करतना इंग्लंडाचो दुसरो डाव 122चेर सोंपिल्लो.
राजकोट टॅस्टींत युवा बॅट्समन यशस्वी जयस्वालान दोट्टी शेंकडो मारलो, जाल्यार शुभमन गिल आनी पदार्पणाची मॅच खेळपी सरफराज खानान अर्द शेंकड्यांची खेळी केली. व्हड शॉर्ट मारचे पयलीं तांणी खेळपट्टीचेर वेळ काडलो. भारतान 228.5 ओव्हरींनी वट्ट 875 धांवड्यो केल्यो. दुसरे वटेन इंग्लंडाच्या बॅट्समनांनी आपल्यो विकेटी सहज वगडायल्यो. सध्या धांवड्यो करपाक झुजपी जो रुटान तिसरे टॅस्टींत जसप्रीत बुमराच्या बॉलाचेर रिव्हर्स स्कूप करपाच्या यत्नांत दुसऱ्या स्लिपांत कॅच दिली.
रुट बाद जायना फुडें इंग्लंडाचो डाव गडगडलो. रूटान ज्या वेळार तो शॉर्ट मारलो, त्या वेळार भारताचो म्हत्वाचो ऑफ स्पिनर आर आश्विन मैदानांत नाशिल्लो. भारता कडेन एक बॉलर उणो आशिल्लो. रवींद्र जडेजा दुखापतीतल्यान बरो जावन आयिल्लो. सेगीत तिसरे टॅस्टींत बॉलींग करून बुमरा थकिल्लो.
इंग्लंडाक माळेंत पुनरागमन करपाक जाय जाल्यार ताका बॅझबॉल रणनितीचेर परतून विचार करचो पडटलो अशें जाणकारांक दिसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
