भांगरभूंय | प्रतिनिधी
फास्ट बॉलर जसप्रीत बुमरा आनी लोकेश राहुल हे दोगूय इंग्लंडा आडचे चवथे टॅस्टींत खेळचे नात.
भारतीय क्रिकेट नियामक मंडळान (बीसीसीआय) तांकां पंगडांतल्यान मेकळे केले. जसप्रीत बुमराक विसव दिवपाचो निर्णय घेतला, जाल्यार विकेटकीपर बॅट्समन लोकेश राहुल पुर्णपणान तंदुरुस्त जावंक ना. सध्या तो राष्ट्रीय क्रिकेट अकादमींत पुर्नवसनांत आसा.
बुमराचे सुवातेर फास्ट बॉलर मुकेश कुमाराक पंगडांत सुवात दिल्या. चवथे टॅस्टी खातीर ताका निमाण्या इकरांत सुवात मेळपाक शकता. बुमरा चवथे टॅस्टींत खेळचो ना अशें कांय खबरां पत्रांनी पयलींच खबर दिल्ली. पूण, राहुल चवथे टॅस्टींत खेळटलो अशें म्हणिल्लें.
30 वर्सां पिरायेचो बुमरा माळेंत सगल्यांत चड विकेटी घेवपी बॉलर आसा. तीन टॅस्टींतल्यान मेळून ताणें वट्ट् 17 विकेटी घेतल्यात.
संवसारीक वन डे क्रिकेट सर्ती सावन बुमरा सेगीत खेळत आसा. ताका लागून ताचे वयलो ताण उणो जावचो आनी पांचवे टॅस्टी खातीर ताजो जावचो म्हणून ताका विसव दिवपाचो निर्णय घेतला. तीन मॅचींनी खेळटना ताणें 80.5 ओव्हरी घाल्यात. फाटले मॅचींत ताणें 23 ओव्हरी घाल्ल्यो.
मजगतीं, दुसरे टॅस्टी खातीर दुसरो फास्ट बॉलर मोहम्मद सिराजाक विसव दिल्लो. राजकोटांत जाल्ले मॅचींत तो खेळूंक नाशिल्लो. तिसरे मॅचींत खेळटना ताणें चार विकेटी घेतिल्ल्यो.
भारताचो पंगड असो आसाः रोहीत शर्मा (मुखेली), यशस्वी जयस्वाल, शुभमन गिल, रजत पाटीदार, सरफराज खान, ध्रुव जुरेल (विकेटकीपर), केएस भरत (विकेटकीपर), देवदत्त पड्डीकल, रविचंद्रन अश्विन, रवींद्र जडेजा, अक्षर पटेल, वॉशिंग्टन सुंदर, कुलदीप यादव, मोहम्मद सिराज, मुकेश कुमार आनी आकाश दीप.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
