भांगरभूंय | प्रतिनिधी
इंग्लंडा आडचे पांच टॅस्टींचे माळेंत भारत 2-1 असो मुखार आसा. माळेंतली चवथी मॅच फाल्यांच्यान रांचींत सुरू जातली. हे मॅची खातीर फास्ट बॉलर जसप्रीत बुमराक विसव दिला जाल्यार विकेटकीपर बॅट्समन लोकेश राहुल जखमी आसा. निवड समितीन फास्ट बॉलर मुकेश कुमाराची निवड केल्या.
निवड समितीन बुमराक विसव दिवपाचो निर्णय घेतला. पूण, हे मॅचींत अणभवी बुमराची गैरहाजेरी जाणावपाक शकता. सुरवातीच्या तीन मॅचींनी खेळटना ताणें 17 विकेटी घेतल्या. पोरूं भारतांत जाल्ले संवसारीक वन डे क्रिकेट सर्ती सावन तो सेगीत खेळत आसा. ताका लागून विसव दिवपाचो निवड समितीन निर्णय घेतला.
रांचीची खेळपट्टी स्पिनरांक मजत करपी आसल्यार पंगड वेवस्थापन चार स्पिनरांक खेळोवपाक शकता. फास्ट बॉलर म्हणून मोहम्मद सिराजाक खेळोवपाक शकता आनी रवींद्र जडेजा, कुलदीप यादव आनी आर आश्विन हांच्या वांगडा अक्षर पटेलाक खेळोवपाक शकता.
जर रांचीची खेळपट्टी दुसरे आनी तिसरे टॅस्टी भशेन आसत जाल्यार भारत दोन फास्ट बॉलरांक खेळोवपाक शकता. अशा वेळार मोहम्मद सिराजा वांगडा मुकेश कुमार फास्ट बॉलिंग विभाग सांबाळपाक शकता. ना जाल्यार युवा आकाश दीप पदार्पण करपाक शकता.
भारताचो टॉप ऑर्डर सध्या बरें प्रदर्शन करता. फाटले मॅचींत मुखेली रोहीत शर्मा (131) आनी यशस्वी जयस्वाल (214) हाणें आकर्शक खेळी केल्ली. गिलान लेगीत 91 धांवड्यांचें योगदान दिल्लें. मदले फळयेंत रजत पाटीदाराक सोडलो जाल्यार सरफराज खानान दोन अर्द शेंकडे मारल्यात. जाल्यार जडेजान (112)शेंकड्याची खेळी केल्ली. रजत पाटीदार अपेशी थारलो आसलो तरी ताका आनीक एक संद मेळुये. दोन मॅचींनी ताणें फकत 46 धांवड्यो केल्यात. रजताक भायर दवरलो जाल्यार ताचे सुवातेर देवदत्त पडिक्कलाक संद मेळपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
