भांगरभूंय | प्रतिनिधी
भाडेकरूंची तपासणी खर करपाची आमदारांची मागणी: वाडपी गुन्यांवाचेर सभाघरांत हुस्को उक्तायलो
पणजी, प्रतिनिधी : बावन्सरांच्या नोंदणे खातीर फुडल्या अधिवेशनांत विधेयक हाडून कायदो करतले. गुन्यांवकारी घडणुकांक आळो घालपा सयत गुन्यांवाच्या तपासा खातीर आतां पंचायत, हॉटेल्स तशेंच म्हत्वाच्या वाठारांतले सीसीटीव्ही कॅमेरे सरळ पुलीस स्टेशनांत जोडटले. पुलीस तपास अहवाला बगर कोणेंच कोणाक भाड्याक दवरचें न्हय, अशें आवाहन मुख्यमंत्री डॉ. प्रमोद सावंत हांणी केलें.
कांदोळे जाण्ट्या मनशाच्या खून प्रकरणाचे लक्षवेधी सुचोवणेचेर सभाघरांत बरोच वेळ चर्चा जाली. कांदोळे खुनाचो तपास सीसीटीव्ही फुटेजीच्या आदारान सुरू आसा. तपासा खातीर खासा पंगड स्थापन केल्ल्याची म्हायती डॉ. सावंत हांणी दिली. आमदार मायकल लोबो हांचे लक्षवेधी सुचोवणेक ते जाप दिताले.
ओर्डा – कांदोळे फाटल्या १० वर्सां सावन रावपी ओर्लांडो सुआरीस हांच्या खुनाक लागून कांदोळे भंयाचें वातावरण तयार जालां. हो भंय पयस करपा खातीर सरकारान कितें उपाय येवजण केल्या, अशी विचारणा लोबो हांणी लक्षवेधी सुचोवणे वेळार केली.
कळंगूटे पुलीस स्टेशनाच्या वाठारांत पुलिसांनी गस्त वाडयल्या. रस्त्यांचेर नाकाबंदी सुरू आसा. खुनाच्या तपासा खातीर पुलिसांनी खासा पंगड स्थापन केल्यात. कोणूय अनवळखी मनीस रातच्या वेळार भोवतना दिसलो जाल्यार ताका ताब्यांत घेवन चवकशी जाता. खून जालो तेन्नाची सीसीटीव्ही फुटेज पुलिसांनी ताब्यात घेतल्या. गुन्यांवांक आळो घालपा खातीर उपाय येवजण्यो सुरू आशिल्ल्याचें मुख्यमंत्र्यांनी सांगलें.
हे लक्षवेधी सुचोवणेचेर डिलायला लोबो, आलेक्स रेजिनाल्ड, विजय सरदेसाय, ऍड. कार्लोस फेरेरा, निलेश काब्राल, रूडाॅल्फ फर्नांडीस, उल्हास तुयेंकार, डॉ. चंद्रकांत शेट्ये, जेनिफर मोन्सेरात, आंतोनियो वाज, युरी आलेमांव हांणी विचार मांडले.
भाडेकरूंची तपासणी करपाची गरज
जे लोक भाड्याक रावता, तांचे कडल्यान वळखपत्र घेवपाक जाय, अशी मागणी आमदार लोबो हांणी केली. गस्ती खातीर पुलिसां कडेन वाहनांचो उणाव आसा. फावो ते प्रमाणांत मोटारसायकली तशेंच गाडयो पुलिसांक दिवपाची गरज आसा. राज्यांत गुन्यांवाचें प्रमाण वाडत आसा. २०२० ते २०२४ ह्या चार वर्सांत गोंयांत १४५ खून जाल्यात, अशी म्हायती युरी आलेमांव हांणी दिली.
‘मारता रे, मारता रे’ असो आवाज
खून जाल्लो ओर्लांडो सुआरीस हो आमचो सोयरो लागता. सीसीटीव्ही फुटेजीचेर ‘मारता रे, मारता रे’ असो आवाज आयकुपाक येता. ह्या खुनाचो सारको तपास करपाक जाय, अशी मागणी आमदार डिलायला लोबो हांणी केली.
पुलिसांनी रातचे वेळार गस्त वाडोवपाची मागणी आमदार आलेक्स रेजिनाल्ड हांणी केली. राज्यांत बावन्सरांचो वापर वाडपाक लागला. बावन्सरांच्या वापरा विशीं धोरण आसपाक जाय, अशी मागणी विजय सरदेसाय हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
