भांगरभूंय | प्रतिनिधी
मडगांव, प्रतिनिधी : वेगान येवपी खाजगी बस चालकाचें गाडये वयल्यान नियंत्रण वचून ताणें म्हामार्गा वयल्यान येवपी दुचाकी चालकाक धपको दिलो. ह्या अपघातांत दुचाकी चालक एकनाथ यशवंत नायक (६०, रा. बेतूल) हाका जाग्यारूच मरण आयलें. ह्या प्रकरणांत कुंकळ्ळी पुलिसांनी बस चालकाक ताब्यांत घेतला.
राज्यांतल्या अपघातांत मरण येवप्यांचोय आंकडो वाडतूच आसा.
मेळिल्ले म्हायती प्रमाण, कर्नाटक बंगळुरु हांगची खाजगी बस बाळ्ळी हॉस्पिटल वाठारांतल्या महामार्गार आयली तेन्ना बसचालक दुर्गाप्पा कारबोंडा (३७, रा. हावेरी कर्नाटक) हाचें बशी वयल्यान नियंत्रण सुटलें. बस वेगान आशिल्ल्या मुखारच्यान वचपी दुचाकीक बसीन धपको दिलो. हातूंत एकनाथ यशवंत नायक हो गंभीर जखमी जालो. नायक हांकां बाळ्ळी भलायकी केंद्रांत व्हेलें. मात उपचारा पयलींच तांकां का मरण आयिल्लें.
अपघात जाल्ल्याचें समजतांच बेतूलचे नागरीक रोखडेच बाळ्ळी आयले. तांणी दिल्ले म्हायती प्रमाण, एकनाथ नायक हे आपल्या भावाक बाळ्ळी हॉस्पिटलांत डायलेसिस खातीर घेवन आयिल्ले. तेन्ना हो अपघात जालो. खासगी बसींच्या वेगाचेर नियंत्रण नासता. हॉस्पिटला लागसारच्या रस्त्यार स्पिडब्रेकर वा रम्बलर उबारूंक नाशिल्ल्यान हांगच्यान गाडयो वेगान वतात. बाळ्ळी हॉस्पिटलांत नायक हांची कूड दवरल्या. मात ह्या हॉस्पिटलांत हर्सवॅन ना. वैजकी अधिकार्यां कडल्यान खाजगी हर्सवॅन हाडून मरण आयिल्ल्यांची कूड गोंय जिल्हो हॉस्पिटलांत व्हरपाक सांगतात. राज्य सरकारान हाचे कडेन लक्ष दिवचें अशी मागणी नागरिकांनी केल्या.
कुंकळ्ळी पुलिसांनी अपघाता प्रकरणांत गुन्यांव नोंद केला. बसचालक दुर्गाप्पा कारबोंडा हाका ताब्यांत घेतला. ह्या प्रकरणाचो फुडलो तपास पुलीस निरीक्षक डायगो ग्रॅसिअस हांच्या मार्गदर्शना खाला सुरु आसा.
राज्यांत जानेवारी सावन १०१ अपघातांत मरण
राज्यांत अपघातांत मरण आयिल्ल्यांचो आंकडो दिसान दीस वाडत आसा. जानेवारी २०२४ सावन आतां मेरेन राज्यांत अपघातांत मरण आयिल्ल्यांचो आंकडो १०१ जाला. जाल्यार एप्रील म्हायन्याचो आंकडो पळयल्यार ह्या १७ दिसांनी २१ जाणांक अपघातांत मरण आयलां. हातूंत चडश्या अपघातांत मरण दुचाकी चालकांक आयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
