भांगरभूंय | प्रतिनिधी
बाली : इंडोनेशियांतल्या बाली बेटाचेर गियान्यार वाठारांतल्या असवरा रिसॉर्ट उबुद हांगा चार भारतीय पर्यटकां कडेन संबंदीत एक वादग्रस्त घडणूक मुखार आयल्या. चेकआवटा मजगतीं हॉटेल कर्मचार्यांनी केल्ले तपासणेंत तांच्या बॅगांनी रिसॉर्टांतलें सामान मेळिल्ल्याचो आरोप केला.
हे विशीं मेळिल्ले चड म्हायती प्रमाण, संबंदीत भारतीय पर्यटकांनी १६ एप्रिलाक दोन कुडींचें बुकींग केल्लें आनी ते थंय राविल्ले. १९ एप्रिलाक सकाळीं चेकआवट करतना सदचे तपासणे वेळार कुडींतलें कांय सामान गायब आशिल्ल्याचें कर्मचार्यांच्या लक्षांत आयलें. उपरांत दुबाविताच्या बेगाची तपासणी केली.
तपासणे मजगतीं, बॅगेंतल्यान टॉवेल, बाथरोब, हेअर ड्रायर, डोअरमॅट, जेवणाचीं आयदनां तशें टिव्ही रिमोट बॉक्स अशें सामान मेळिल्ल्याचें सांगलें. हे घडणुकेचो व्हिडियो सोशल मिडियाचेर व्हायरल जालो. तातूंत कर्मचारी तांचीं बॅगां उक्तीं करून सामान भायर काडटना दिसतात. जाल्यार पर्यटक कुशीक आशिल्ले दिसतात.
थळाव्या पुलिसांचे म्हायती प्रमाण, हॉटेल वेवस्थापनान रोखडीच चेकआवट प्रक्रिया थारावन स्पश्टीकरण मागलें. मात प्रकरण वाडोवपाचें सोडून रिसॉर्टान हें प्रकरण भितरल्या पांवड्यार सोडोवपाचो निर्णय घेतलो. संबंदीत पर्यटकांनी सगलें सामान परत केल्ल्यान कसलेच तरेची कारवाय करूंक ना. हे घडणुके उपरांत पर्यटकांक थंयच्यान वचपाची परवानगी दिली.
तशेंच ह्या प्रकाराक लागून सोशल मिडियाचेर खर प्रतिक्रिया आयिल्ल्यान परदेशांत भारतीय पर्यटकांचे वागणुके विशीं परत चर्चा सुरू जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
