भांगरभूंय | प्रतिनिधी
सोमारा सावन सुरू जावपी नियोजीत संप फाटीं
पणजी : बालरथ बशीचे चालक तशेंच हेर कर्मचाऱ्यांचो पगार वाडोवपा सयत तांकां हेर सुविधा दिवपाचें आस्वासन मुख्यमंत्री डॉ. प्रमोद सावंत हांणी दिल्ल्यान बालरथ कर्मचाऱ्यांनी संप फाटीं घेतला. बालरथ कर्मचारी संघटणेच्याे फुडारी स्वाती केरकार हांणी ही म्हायती दिली.
पगार वाडोवपा सयत हेर मागण्यां खातीर बालरथ बशींचें चालक तशेंच कर्मचारी सोमारा सावन संपाचेर वचपाचे आशिल्ले. संपाची घोशणा बालरथ कर्मचारी संघटणेन केल्ली. सोमारा सावन विधानसभेचें अर्थसंकल्पी अधिवेशन सुरू जाता. अधिवेशनाचो म्हूर्त सादून बालरथ कर्मचाऱ्यांनी संपाची शिटकावणी दिल्ली. बिरेस्तारा बालरथ संघटणेचे फुडारी आनी मुख्यमंत्री हांचें मदीं चर्चा जाली. शिक्षण संचालक शैलेश जिंगडे, स्वाती केरकार, बालरथ कर्मचारी बसकेक हाजीर आशिल्ले.
बालरथ कर्मचाऱ्यांचो पगार वाडोवपा विशी अर्थसंकल्पांत तजवीज जातली. पीएफ तशेंच हेर मागण्यो मान्य जातल्यो, अशें आस्वासन मुख्यमंत्री डॉ. प्रमोद सावंत हांणी दिलां. बसके उपरांत स्वाती केरकार हांणी पत्रकारांक म्हायती दिली.
बालरथाच्या चालकाक 11 हजार जाल्यार अटेंडंटाक 5 हजार 500 रुपया पगार मेळटा. चालकाक 20 हजार रुपया मेरेन पगार मेळपाक जाय. तांची पगाराची श्रेणी निश्चीत करपाची मागणी आसा. तशेंच तांचो कान्ट्रॅक्ट 10 म्हयन्यांचो आसता. हो कॉन्ट्रॅक्ट 12 म्हयन्यांचो जावपाक जाय. तशेंच तांकां पीएफचो लाव मेळना. पीएफा सयत विम्याचो लाव मेळपाक जाय. बालरथ कर्मचाऱ्यांचो प्रस्न आपणाक खबर आसा. अर्थसंकल्पांत पगार वाडोवपाची तजवीज आसतली, अशें मुख्यमंत्र्यांनी सांगलें.
बालरथ ही येवजण आसा. चालक तशेंच कर्मचाऱ्यांचो पगार वाडोवपाची तजवीज येवजणेंत आसपाक जाय. मुख्यमंत्र्यांचेर आमचो विस्वास आसा. हाका लागून नियोजीत संप आमी फाटीं घेतला. आस्वासना प्रमाण मागण्यो मान्य जाल्यो ना, जाल्यार संप करपाचो पर्याय उक्तो आसा, अशें स्वाती केरकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
