भांगरभूंय | प्रतिनिधी
मडगांव, प्रतिनिधी : बार्शेंच्या रानांतल्या तळ्या लागसारा भोंवपाक गेल्ल्यां मदल्या राजेंद्र शाबा वेळीप हाका उदकांत बुडून मरण आयलें. कुंकळ्ळी पुलिसांनी असैमीक मरण म्हणून नोंद करून ह्या प्रकरणाचो तपास करतात.
मेळिल्ले म्हायती प्रमाण, पांच जाण इश्ट वनभोजन करपाक बार्शेंच्या रानांतले तळये लागसार गेल्ले. तळये लागसारा पावतांच ह्या सगळ्या इश्टांनी गजाली मारल्यो. उपरांत जेवणाचो वेळ जाल्ल्यान जेवपा खातीर लागपी आयदनां घेवन राजेंद्र वेळीप हो तळयेर गेलो. आयदनां धुंवपाक गेल्लो राजेंद्र तळयेंत बुडलो हें पळोवन ताचे वांगडा आयिल्ल्या इश्टांनी बोवाळ केलो. हे विशींची म्हायती तांणी थळाव्यांक दिली. उपरांत सरपंचान कुंकळ्ळें पुलिसांक कळयलें. कुंकळ्ळें उजो पालोवपी दळाच्या जवानांनी येवन तळ्यांत देंवून राजेंद्राचो सोद घेवपाचो यत्न केलो. वरभर सोद घेतल्या उपरांत तळयेंत राजेंद्राची कूड सांपडली.
राजेंद्रा फाटल्यान ताची घरकान्न आनी दोगां भुरगीं असो परिवार आसा. कुडीचें पोस्टमार्टम दक्षीण गोंय जिल्हो हॉस्पिटलांत जाले उपरांत ताची कूड कुटुंबियांचे सुवादीन केली. हे विशीं कुंकळ्ळी पुलिसांनी असैमीक मरण म्हणून नोंद केल्या. पुलीस निरीक्षक डायगो ग्रॅसिअस हांच्या मार्गदर्शना खाला पुलीस उपनिरीक्षक तेजसकुमार नायक फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
