भांगरभूंय | प्रतिनिधी
भांगरभूंय । प्रतिनिधी
म्हापशेंः बार्देश बाजार गिरायक सहकारी सोसायटीक 2021-22 च्या अर्थीक वर्सा 40 लाख 81 हजार रुपयांचो वट्ट फायदो मेळिल्ल्याची म्हायती सोसायटीचो अध्यक्ष धर्मा चोडणकार हांणी सोसायटीच्या 33वे वर्सुकी साबार बसकेंत दिली. भागधारकांक 20 टक्के लाभांश दिवपाची घोशणा चोडणकारान केली. बाजारांत 31 कोटी 32 लाख रुपयांची उलाढाल जाली अशें मरड हांगच्या तुळशीराम सभाघरांत आयोजीत केल्ले हे बसके वेळार सोसायटीचो उपाध्यक्ष चंद्रकांत शेटगांवकार, लेकापाल नंदन सिरसाट तशेंच सगळे संचालक हाजीर आशिल्ले.
धर्मा चोडणकारान सोसायटीच्या वावराचो नियाळ घेतलो. म्हापशें, खोर्ली, दिवचल, ताज सिकेरी, मडगांव, हायलंड आनी कळंगुटे हांगच्या बाजाराच्या फाट्यांतल्या वेव्हाराची तांणी म्हायती दिली. मडगांव फांट्यांचे रोखडेच नवे सुवातेंत स्थलांतरण करतले. हायलंड हांगचो फांटो कोरोना म्हामारी वेळार बंद केल्लो अशें सांगतना सोसायटीची मॉल संकल्पना प्रत्यक्षांत हाडपाचे यत्न चल्ल्यात अशी म्हायती तांणी दिली.
साबार बसकेंत 2021-22 वर्साच्या हिशेबाचो ताळेबंद सादर करून तो मानून घेतलो. 2023-34 वर्साच्या अदमासपत्रकाक साबार बसकेत मान्यताय दिली. नंदन सिरसाट हांचीच हिशेब तपासनीस म्हणून नियुक्ती केली.
साबार बसकेंत नेमांत दुरुस्ती करून 100 रुपयांचे 1000 शॅर वाडोवपाचो निर्णय घेतिल्ल्यान आतां भाग भांडवल 20 लाख रुपयां मेरेन व्हरतले. महेश फळारी, श्यामसुंदर कवठणकार, रवींद्र फोगेरी, विजय भिके, हमीद मुल्ली, प्रदीप नायक, गोविंद मणेरकार, किरण नार्वेकार, प्रकाश परब, विजय पबर ह्या भागधारकांनी सूचोवण्यो मांडल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
