भांगरभूंय | प्रतिनिधी
प्रशासन तुमच्या दारांत उपक्रमांत प्रकार उजवाडाक
भांगरभूंय । प्रतिनिधी
म्हापशें: बार्देस मामलेदार कार्यालयांत फाटलीं 17 वर्सां खटलो प्रलंबीत आशिल्ल्याचें प्रकरण प्रशासन तुमच्या दारांत उपक्रमा वेळार उजवाडाक आयलें. राज्यांत एका दिसांत म्युटेशन जावपा सयत जमीन हडप प्रकरणांतलीं म्युटेशनां मेजक्यां दिसांनी जाल्यांत. तरी लेगीत 17 वर्सां एकादें प्रकरण प्रलंबीत उरिल्ल्यान सरकार आनी सरकारी अधिकारी हांचे कडल्यान सामान्य लोकांक खऱ्यांनीच न्याय मेळटा काय कितें, असो प्रस्न हे कार्यावळी उपरांत लोकांनी उपस्थीत केलो.
मुख्यमंत्री डॉ. प्रमोद सावंत हांच्या फुडारपणा खालचें सरकार येता त्या 18 मार्चाक चार वर्सां पुराय करतलें. ताका लागून सरकारान प्रशासन तुमच्या दारांत उपक्रमाचें आयोजन केलां. शुक्रारा बार्देस म्हालांतलो हो उपक्रम म्हापशेंच्या सरकारी संकुलाच्या वाठारांत जालो. वीज मंत्री सुदिन ढवळीकार ह्या वेळार मुखेल सोयरे आशिल्ले. तशेंच उपसभापती ज्योशुआ डिसोझा, आमदार केदार नायक, आमदार अॅड. कार्लुस फेरेरा, नगराध्यक्ष प्रिया मिशाळ, उपनगराध्यक्ष विराज फडके, गोंय उर्जा विकास संस्थेचे वांगडा संजीव जोगळेकार, एमआरई संचालक आलेक्स डिकॉस्टा, मुख्य वीज अभियंते स्टिफन फर्नांडीस, गृहनिर्माण मंडळाचे वांगडी सचीव सुधीर केरकार हाजीर आशिल्ले.
कार्यावळीचे सुवातेचेर भोवतेक पंचायत, पालिकेचे लोकप्रतिनिधी आनी सरकारी कर्मचाऱ्यांचोच आंकडो चड आशिल्लो. सर्वसामान्य लोकांची संख्या सामकीच उणी आशिल्ली.
उपसभापती ज्योशुआ डिसोझा आनी हळदोणेंचे आमदार अॅड. कार्लुस फेरेरा हांणी हे संबंदांत सरकारान उण्यांत उणे 15 दीस आदीं हे कार्यावळीची जनजागृती करप गरजेचें आसा, अशी सुचोवणी केली.
ह्या वेळार एका मनशान फाटल्या 17 वर्सां सावन आपलें म्युटेशन प्रलंबीत आशिल्ल्याचें गाराणें मंत्री ढवळीकार हांचे मुखार मांडलें. तारीख पे तारखेक लागून आपूण उबगलां. आपली पिराय वाडल्या आनी आपूण मरपाक पावलां. प्रशासनान उण्यांत उणें हें प्रकरण केन्ना सोंपतलें तें तरी स्पश्ट करचें, अशी मागणी तांणी केली. ताचेर मंत्री ढवळीकारान सांगलें, तुजो म्युटेशन केस नंबर आनी नांव बरोवन दी. तुजो विशय सोंपयतां.
कोमुनिदाद जमनी वयलीं घरां आनी बांदकामां सरकारान अधिकृत करचीं. वर्सां वर्सां मामलेदार न्यायालयांतले खटले ताकतिकेन निकालात काडप, हावसिंग येवजण्यांक मेळपी उणो प्रतिसादा फाटलीं कारणां सोदचीं, कांय प्रशासकीय कर्मचाऱ्यां कडल्यान लोकांक मेळपी वायट वागणूक, हे सारक्यो समस्या लोकांनी ह्या वेळार मांडल्यो.
आदले उपनगराध्यक्ष विनोद फडके हांणी सांगलें, सरकाराच्या हावसींग बोर्डाच्या येवजण्यांक चड करून प्लॉटस् तशेंच फ्लॅटाचे पावणेक उणो प्रतिसाद मेळटा. हाचीं कारणां आदीं सरकारान सोदचीं. सर्वसामान्य वा गरीब मनीस 50 ते 70 लाख रुपयांची बोली कसो लायतलों. हे दर सामान्यांक परवडपाचे नात. नास्नोळेंचे पंच सतीश गोवेकारान सांगलें, सरकारान कोमुनिदाद जमनी वयलीं बांदकामां अधिकृत करपाची घोशणा केल्ली. पूण अजून हालचाल मात दिसना. हाका 20 वर्सां जालीं. तुमी सरकाराचो भाग आशिल्ल्यान सरकाराक आतां लक्ष घालपाक सांगचें, अशी तांणी मंत्री ढवळीकार हांचे कडेन मागणी केली.
‘कोमुनिदाद जमनी वयलीं घरा अधिकृत करात’
फाटलीं कितलीशींच वर्सां आपलें कुटुंब कोमुनिदादीचे जमनींत ल्हानशी खोप बांदून रावता. आमीय कर फारीक करतात. सरकारान अशीं घरां पालिके काला अधिकृत करून दिवचीं. आमकां बरें घर बांदपाचें आसा. बँकवाले घर बेकायदो आसा अशें सांगून घरा खातीर रीण दिनात, अशी समस्या म्हापशेंचे एके बायलेन मांडली. ताचेर उपजिल्होधिकाऱ्यान सांगलें, सध्या सरकारान खाजगी मालमत्ते खातीर बांदकामां कायदेशीर करपाचो कायदो हाडला. अजून कोमुनिदादचे जमनींतल्या बांदकामा विशीं असो कसलोच कायदो ना.
एका मनशा खातीर ट्रान्सफोर्मर….?
नानोडें गांवांतल्या दोंगराळ वाठारांत कांय प्लॉट करून तांची विक्री जाल्या. आतां थंय एकल्यान घर बांदून रावपाक सुरवात केल्या. ह्या एका मनशा खातीर वीज खात्यान ट्रान्सफोर्मर बसयता. ही कृती पर्यावरणा खातीर हानीकारक आसा. जनावरां सकयल्या शेतांत येवन नाशाडी करतात. अशे स्थितींत शेतकारांनी शेतां कशी कसचीं, असो प्रस्न एका मनशान विचारलो. हाचेर मंत्र्यान संबंदिताक पंचायत आनी गटविकास अधिकाऱ्या कडेन कागाळ करपाक सांगली. तशेंच दोगूय कारवाय करिनात जाल्यार जिल्होधिकाऱ्या सयत आपल्याक प्रत धाडात, अशी सुचोवणी केली.
लोकांचे प्रस्न सुटावे करपाचो उद्देश आसचो: अॅड. कार्लुस फेरेरा
प्रशासन तुमच्या दारांत संकल्पना बरी आसा, पूण ती मेळाव्या पुरती मर्यादीत आसची न्हय. लोकांचे प्रस्न तातूंत सुटपाक जाय. कारण उपक्रमाचो उद्देश सफळ जावपाक जाय. उण्यांत उणे 15 दीस हे कार्यावळी विशीं जागृती करची. सरकारा समाज कल्याणाचे पयशे लोकांक वेळार दिवपा सयत शेतांतले बांद वेळार दुरुस्त करचे, अशी सुचोवणी आमदार अॅड. कार्लुस फेरेरा हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
