भांगरभूंय | प्रतिनिधी
भांगरभूंय । प्रतिनिधी
म्हापशेंः वीज खात्यान बार्देश आनी पेडणे तालुक्यांतल्या 14 हजार वीज गिरायकांक वीज बिलाची थकबाकी भरपाक खातीर भौशीक नोटीस धाडल्या. ह्या गिरायकां कडल्यान खात्यान सुमार 10 कोटी परस चड रुपयांची थकबाकी येणे आसा. दिल्ले मुजतींत बिलां भरलीं ना जाल्यार कनेक्शना तोडपाची शिटकावणी नोटिशींत दिल्या.
वीज खात्यान सध्या थकबाकी वसुलीचो निर्णय घेतला. ताका लागून कार्यकारी अभियंत्यान ही भोशक नोटीस जारी केल्या. ल्हान कारखाने, वेवसायीक, आस्थापना आनी लोकां कडेन ही थकबाकी आसा. जांची थकबाकी एक हजारां वयर आसा तांकां वसुली खातीर नोटीस धाडटले. गिरायकांनी ती भरली ना जाल्यार वीज कनेक्शना तोडटले. अशें वीज खात्याच्या अधिकाऱ्यांनी सांगलांं.
वीज खात्याच्या म्हापशें वीज विभाग 6 आनी 17 विभागाच्या कार्यकारी वीज अभियंत्यान ही भौशीक नोटीस धाडल्या.विभाग 6 त म्हापशें नगरपालिका वाठार, कळंगुटे, कांदोळी, नेरूल, रेईश-मागूश, साळगांव, सुकूर, पर्वरी, पेन्ह दी फ्रान्स, साल्वादोर द मुंद, पिळर्ण, गिरी, हडफडे-नागवा, वेर्ला-काणका, बस्तोडें, उसकय, पोंबुर्फा-एकोशी, ओळावली, हळदोणे, कारोना, कालवी, किटला व खोर्जुवे ह्या गावांतल्या वीज गिरायकांचो आसपाव आसा आनी थकबाकी आशिल्ले चार हजार गिरायकां आसात. विभाग 17त थिवी, शिरसई, हणजूण, आसगाव, शिवोली, सडये, कामुर्ली, नास्नोळा, मयडे आनी कोलवाळ या बार्देश तालुक्यातील गावांसयत पुराय पेडणे तालुक्याचो आसपाव आसा आनी थकबाकी आशिल्ले सुमार 10 हजार गिरायकां आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
