भांगरभूंय | प्रतिनिधी
म्हापशें, प्रतिनिधी ः फाटले दोन दीस सेगीत पडपी पावसाक लागून बार्देश तालुक्यांत आडखळ निर्माण जाली. तीन घरांच्यो वणती कोसळ्ळ्यो. जाल्यार सात घरांचेर झाडां पडलीं. कोलवाळच्या तळेश्वर राष्ट्रोळी देवळांत उदक भितर सरलें. फाटल्या दोन दिसांत उजो पालोवपी दळाक बार्देश तालुक्यांत वट्ट 24 कॉल आयले. तातूंतले 19 कॉल म्हापशें कार्यालयांत नोंद जाल्यात.
पर्वरेच्या पेन्हा दी फ्रान्काच्या माटववाड्यार पावसाक लागून रघुनाथ रातबोली हांच्या घराची वणत कोसळ्ळी. फेअरा बाईक्सा- म्हापशेंच्या तेंडुलकार हांच्या घराची वणत कोसळ्ळी. जाल्यार म्हापशेंच्या गावसावाड्याच्या गोलतेकार हांच्या घराच्या फाटल्या वटेनची वणत कोसळ्ळी. ह्या तिनूय घडणुकांनी सुमार 4 लाखांचें लुकसाण जालें.
गिरी, पर्रा, खोर्ली, कोलवाळें, असगांव हांगाच्या सात घरांचेर झाडां पडलीं. तातूंतले तीन झाडां उजो पालोवपी दळाच्या जवानांनी कापून कुशीक केली. जाल्यार हेर चार झाडां कुशळ व्यक्तीं कडल्यान कापून उडोवपाचो सल्लो घर धनयांक दिलो.
ते भायर गिरी, असगांव, हणजूणां, पर्रा, थिवे, कारोना, आल्तीन म्हापशें, दत्तवाडी म्हापशें, पिळर्ण, पोंबुर्फा, पैठण आनी पर्वरे वाठारांतल्या रस्त्यांचेर वीज लायनीं वांगडा झाडां पडलीं. म्हापशें, पिळर्ण आनी पर्वरे उजो पालोवपी दळाच्या जवानांनी हीं झाडां कापून कुशीक केली.
कोणीवाडो- कोलवाळे गटारांत उदक भरिल्ल्यान श्री तळेश्वर राष्ट्रोळी देवळांत पावसाचें उदक भितर सरुन लुकसाण जालें. राश्ट्रीय म्हामार्ग रुंद करतना न्हंयेक जोडपी गटारांचे काम जावंक ना. पावसाच्या उदकाचो योग्य विसर्ग जावंक नाशिल्ल्यान हो वाठार बुडलो.
नमोशी गिरींत पावसाच्या उदकाचो निचरो जावंक नाशिल्ल्यान पंचायत घर इमारती वांगडाच ह्या वाठारांत हुंवारा सारकी परिस्थिती निर्माण जाल्या. इमारतींत हें उदक भितर सरपाक लागून फाटल्या सप्तका सावन ग्राम पंचायत घर बंद आसा. पंचायत कार्यालय बंद आशिल्ल्यान थंयच्या लोकांची गैरसोय जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
