भांगरभूंय | प्रतिनिधी
मुख्यमंत्री : सांखळे पुरुमेंताच्या बाजाराचें उक्तावण
भांगरभूंय । प्रतिनिधी
दिवचल : बायलांनी अर्थीक नदरेन सक्षम जावप ही काळाची गरज आसा. सरकारान ग्रामीण बायलांक रोजगार, वेवसाय आनी अर्थीक मजत मेळची हे खातीर विवीध येवजण्यो सुरू केल्यात. आपमजत गटांच्या माध्यमांतल्यान बायलांक व्हड प्रमाणांत रीण वांटलां. फाटल्या सात वर्सांत 350 कोटी रुपयां परस अदीक निधी वितरीत केला. हाका लागून खूबश्या बायलांनी स्वताचे वेवसाय सुरू केल्यात, त्यो ‘लखपती दीदी’ जातात. ग्रामीण वाठारांतल्या बायलांक अर्थीक नदरेन सक्षम, स्वावलंबी आनी आत्मनिर्भर करचे खातीर केंद्र आनी राज्य सरकार विवीध येवजण्यांच्या माध्यमांतल्यान नेमान यत्न करता. महिला सक्षमीकरणा खातीर चालीक लायतात त्यो येवजण्यो खुबूच फायद्याच्यो थारतात, अशें मुख्यमंत्री डॉ. प्रमोद सावंत हांणी सांगलें. सांखळेच्या रवींद्र भवनांत आयोजीत दोन दिसांच्या पुरुमेंताच्या बाजाराचें उक्तावण केले उपरांत ते उलयताले.
गोंय राज्य ग्रामीण उपजिविका मोहीम, ग्रामीण विकास विभाग, गोंय सरकार हांचे वतीन तशेंच रवींद्र भवन, सांखळी हांच्या पालवान आयोजीत केल्ल्या ह्या विशेश बाजाराक लोकांचो उत्स्फूर्त प्रतिसाद मेळ्ळो. गोंयभरांतल्या विवीध महिला आपमजत गटांनी ह्या प्रदर्शनांत वांटो घेवन परंपरीक खाद्यपदार्थ, घरगुतीं उत्पादनां, हस्तकला, साहित्य तशेंच विवीध ग्रामीण उत्पादनांचें आकर्शक स्टॉल उबारिल्ले.
घरांतली बायल सक्षम जाली जाल्यार पुराय कुटुंब सक्षम जाता. बायलां मदीं खूब तांक आसा. तांकां योग्य संद आनी मार्गदर्शन मेळ्ळें जाल्यार त्यो समाजांत व्हड बदल घडोवपाक शकतात. गोंय सरकार बायलांच्या फाटल्यान घट उबें आसा, अशें मुख्यमंत्र्यान सांगलें. ग्रामीण आनी शार वाठारांतल्या बायलांनी सरकारी येवजण्यांचो लाव घेवचे खातीर मुखार सरचें. संघटीत रावून आपमजत गट अदीक घटमूट करचे आनी स्वयंपूर्ण गोंय घडोवपांत तुमचें योगदान दिवचें, असोय तांणी उलो मारलो.
ह्या वेळार आमदार डॉ. चंद्रकांत शेट्ये हांणी सांगलें, मुख्यमंत्री डॉ. सावंत हांच्या फुडारपणा खाला गोंयांत सगल्याच मळार उदरगतीक गती मेळ्ळ्या. बायलांक आत्मनिर्भर करचे खातीर सरकारान विवीध येवजण्यो प्रभावीपणान चालीक लायल्यात. ग्रामीण बायलांचे जिणेंत सकारात्मक बदल जाता, अशें तांणी सांगलें. कार्यावळीक आदले खासदार विनय तेंडुलकार, जिल्हो पंचायत वांगडी सुंदर नायक, नगराध्यक्ष सिद्धी प्रभू, ग्रामीण विकास यंत्रणेची अधिकारी दीपाली नायक, दत्ताराम चिमुलकार, तशेंच भाजप पदाधिकारी, महिला आपमजत गटांच्यो प्रतिनिधी आनी हेर मानेस्त हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
