भांगरभूंय | प्रतिनिधी
भांगरभूंय । प्रतिनिधी
वास्कोः बायलांच्या योगदानाची दखल फकत बायलां दिसाचेच कार्यावळींत घेनासतना ती वर्सभर घेवपाची गरज आसा अशें गोंय चेंबर ऑफ कॉमर्साची उपाध्यक्ष प्रतिमा धोंड हिणे सांगलें.
झुवारीनगर हांगच्या एमईएस वसंत जोशी म्हाविद्यालयाच्या बायल विभागांत ‘ज्योती’च्या पालवान आयोजीत केल्ल्या संवसारीक बायलां दीस कार्यावळीत प्रतिमा धोंड मुखेल सोयरी ह्या नात्यान उलयताली. माचयेर मुरगांव शिक्षणीक संस्थेची भांडारी ललिता जोशी, प्राचार्या डॉ मनस्वी कामत आशिल्ली. म्हाविद्यालयांतल्या शिक्षिकांनी पीच.डी पदव्या मेळयल्यात त्या बारा शिक्षिकांचो ह्या वेळार भोवमान केलो.
दरेका शिक्षक, शिक्षिकेन तांची चिकाटी, समर्पण आनी प्रगती खातीर जो वावर चलयला तांची कार्यावळींत तोखणाय केली. गिन्यान आनी शिक्षणा वरवीं फुडले पिळगेक सक्षम करप तशेंच समाज घडोवपाक शिक्षकांची भूमिका म्हत्वाची आसा अशें धोंड हिणे सांगलें. शिक्षणीक मळार करिअर करपी बायलांत सदांच तेंको आनी उर्बां दिवपाची गरज ललिता जोशी हिणे उक्तायली. मुरगांव शिक्षणीक संस्थेची शिक्षण आनी समाज हे विशींचे बांदिलकेची तिणे थोडे भितर म्हायती दिली. डॉ मानसी कामत हिणे सुरवेक सगल्यांक येवकार दिलो. सत्यवान नायक हाणे सूत्रसंचालन केलें आनी डॉ आशिष जोशी हाणे उपकाराचें उलोवप केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.