बायलांचें कवतूक, भोवमान करप गरजेचें

भांगरभूंय | प्रतिनिधी

डिलायला लोबोः स्वामी समर्थ मठांत बायलांचो सत्कार

भांगरभूंय । प्रतिनिधी

म्हापशें: आयज बायलो जागृत जाल्यात. खूबशे उपक्रम चालीक लावन समाजा खातीर वावुरतात. कल्पना चावला सारके बायलेन अंतराळींत वचून नांव जोडलें. अशा बायलांचें कवतूक, भोवमान करप गरजेचें आसा, अशें मत आमदार डिलायला लोबो हांणी उक्तायलें.

शिवोलेच्या श्री स्वामी समर्थ मठा वतीन विवीध मळांचेर उंच भरारी घेतिल्ल्या बायलांचो सत्कार केलो. ह्या वेळार आमदार लोबो मुखेल सोयरी म्हूण उलयताली.

ह्या वेळार महिला आनी बाल विकास खात्याची संचालक दीपाली नायक, जिल्हो पंचायत वांगडी सनिशा तोरस्कार, सडयेंची सरपंच दीपा पेडणेंकार, मार्नाची सरपंच शर्मिला वेर्णेंकार, कृशी खात्याची उपसंचालक प्राजक्ता गोलतेकार, पंच सिंपल धारगळकार, ओशेल पंचायत सचीव मंजिता फडते, डॉ. शिवानी गोलतेकार, मठाचे संस्थापक निलेश वेर्णेंकार, समर्थन संघटणेचे अध्यक्ष प्रेमानंद आरोलकार, उपाध्यक्ष नितीन आगरवाडेकार, यदुवीर सिमेपुरुशकार, शालन वेर्णेंकार, निहा वेर्णेंकार, दिव्या बांदेकार, समीर गडेकार आनी हेर वांगडी हाजीर आशिल्ले.

निलेश वेर्णेंकार हांणी सांगलें, बायलो आतां दादल्यांच्या खांद्याक खांद दिवन करतात. घर संवसार सांबाळून समाजांत वावुरपाचें तांचे कडेन तांक आसा. गोंय विधानसभेंत महिला आमदारांचो आंकडो वाडप गरजेचो आसा. सध्या तीन बायलो आमदार आसात. ही संख्या 30 चेर पावली जाल्यार गोंयकारांक सुशासन मेळपाक शकतलें.

हे कार्यावळींत आमदार लोबो, दीपाली नायक, प्राजक्ता गोलतेंकार, सनिशा तोरस्कार, शर्मिला वेर्णेंकार, दीपा पेडणेंकार, सिंपल धारगळकार, मंजिता फडते आनी डॉ. शिवानी गोलतेकार हांचो सत्कार केलो. अंकिता नायक हांणी कार्यावळीचें सुत्रसंचालन केलें जाल्यार दिव्या बांदेकार हांणी उपकार मानले.