भांगरभूंय | प्रतिनिधी
मडगांव, प्रतिनिधी: केंद्रीय मंत्री नितीन गडकरी हांणी कुंकळ्ळी बायपासा खातीर ३१०.९२ कोटी रुपया मंजूर केल्ले घोशणेक येवकार दितां. बायपासाच्या कामा वेळार घरांचें, तशेंच पर्यावरणाचेंय लुकसाण जावचें ना हाची रस्ते येरादारी मंत्रालयान दखल घेवची असो उलो कुंकळ्ळीचे आमदार आनी विरोधी पक्ष फुडारी युरी आलेमाव हांणी मारलो.
कुंकळ्ळे येरादारीची कोयंडी ही मुखेल समस्या. मुखेल बाजारांतल्यान जड वाहनां यो- वच करतात ताका लागून चलत वतल्यांक धोको निर्माण जाता. सध्याच्या म्हामार्गा सावन कांय मिटर अंतरावर शाळा आसात आनी वाहनांक लागून भुरग्यांकूय धोको निर्माण जाला, अशें आलेमाव हांणी सांगलें.
बांदकाम विभाग तशेंच रस्ते येरादारी मंत्रालय थळाव्यांक विस्वासांत घेवन बायपासची नवी आंखणी करतलें हाची आस्त आसा. बायपासाक लागून हांगच्या घरांचें कसलेंच लुकसाण जावचें ना ही जतनाय हांव घेतलों, अशें आमदारान फुडें सांगलें. सरकारान थळाव्यांक विस्वासांत घेवनूच दांडेवाडो ते उसकिणी आर्क ह्या महामार्गाच्या विस्तारीकरणाचें काम हातांत घेवचें. ह्या म्हामार्गाच्या कुशीक आशिल्ल्या घरांक कांयच लुकसाण जावपाक जायना, हाची दखल सरकारान घेवची असो उलो तांणी मारलो.
बायपास तशेंच म्हामार्ग विस्तारीकरणा खातीर भूयसंपादनाचे प्रक्रियेचेर हांव बारकायेन लक्ष दवरतलों. थळाव्यांक कसलेच त्रास जावचे ना हाची जतनाय घेतलों अशें आस्वासन आलेमाव हांणी दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
