भांगरभूंय | प्रतिनिधी
मैलो व्हरपी टँकराचे चालक, धनी वाट पळोवन परतले
वास्को: भौशीक बांदकाम खात्याच्या बायणांतले कचेरेंतले भूंय गटार विभागाचे दोन कनिश्ठ अभियंते रजेर आशिल्ल्यान आनी जांचे कडेन तात्पुरतो ताबो दिला तांकां एकाच वेळार दोन पदांचे काम सांबाळप कठीण जायत आशिल्ल्यान थंयचे कचेरेंतल्या कामकाजाचेर परिणाम जावंक लागला. काल (मंगळारा) सकाळीं कांय मैलो व्हरपी टँकराचे चालक आनी धनी आपल्यो समस्या मांडपा खातीर कचेरेंत आयिल्ले. पूण खूबसो वेळ रावन लेगीत तांकां अधिकारी मेळूंक नाशिल्ल्यान ते परतून गेले.
एका टँकर चालकान टँकरांतल्यान हाडिल्ल्या मैल्यांत कॅमिकल्स ऑक्सिजन डिमांड चड आशिल्ल्याचो दावो करून त्या टँकराचेर एका म्हयन्याची बंदी घाल्या. ताका लागून एक म्हयनो टँकर मलनिस्सारण प्रक्रिया प्रकल्पांत हाडूंक मेळचो ना. ह्या प्रकरणांत आपली समस्या मांडपा खातीर सदर टँकर चालक, हेर टँकर चालक आनी धनी हे बायणांतल्या भूंय गटार कचेरेंत आयिल्ले. पूण थंय तांची समस्या आयकून घेवपाक कोणूच नाशिल्ल्यान तांची निरशेवणी जाली. मलनिस्सारण प्रक्रिया प्रकल्पांत टँकरान प्रवेश करचे पयलीं भूंय गटार विभागाच्या कर्मचाऱ्या कडल्यान प्रवेश करपा खातीर घेवप तशेंच शुल्क भरपाची गरज आसता. उपरांत प्रकल्पांत गेले उपरांत गोंय मनीसबळ विकास म्हामंडळाचे कामगार टँकरांतल्या मैल्याची चांचणी करतात. मार्गदर्शक तत्वां प्रमाण जर चांचणी आयली जाल्यार टँकरांतलो मैलो त्या प्रकल्पांत सोडटात.
ह्या वेळार कॅमिकल्स ऑक्सिजन डिमांड हें उदक आनी घाणयाऱ्या उदकाच्या गुणवत्तेची मेजणी करतात. जर कॅमिकल्स ऑक्सिजन डिमांड हें चड आसत जाल्यार टँकरांतलो मैलो प्रकल्पांत सोडिनात. त्या दिसा प्रकल्पांत आयिल्ल्या टँकरांतल्या मैल्यांत कॅमिकल्स ऑक्सिजन डिमांड चड आशिल्ल्यान त्या टँकराचेर प्रकल्पांत येवपाक एक म्हयन्याची बंदी घाल्या. पूण सत्य परिस्थिती वेगळीच आशिल्ल्याचें टँकर चालकाचे म्हणणें आसा. आपली समस्या मांडून ते सत्य परिस्थिती संबंदीत अधिकाऱ्या मुखार मांडपाचे आशिल्ले. पूण तांकां अधिकारीच मेळूंक नाशिल्ल्यान तांची निरशेवणी जाली.
बायणांतल्या भूंय गटार कचेरेंतले अभियंते रजेर आशिल्ल्यान रस्तो विभागाच्या अभियंत्या कडेन ताबो दिला. पूण ते दोनूय विभागाक एकाच वेळार न्याय दिवंक शकनात. ताका लागून भूंय गटार कचेरेचें काम लागीं लागीं ठप्प जाल्ल्याचें समजता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
