भांगरभूंय | प्रतिनिधी
खबरां संस्था
कराचीः बाबर आझमाक परत पाकिस्तानाच्या वन-डे आनी टी-20 क्रिकेट पंगडाचो कॅप्टन केला. पाकिस्तानी क्रिकेट बोर्डान (पीसीबी) आयतारा ही घोशणा केली. पोरूं भारतांत जाल्ल्या वन-डे संवसारीक करंड सर्तींत पाकिस्तानाची कामगिरी सामकीच बाबत जाल्ली. तिचे उपरांत बाबर आझमान तिनूय फॉर्मेटांतली कॅप्टनशीप सोडल्ली. ताच्या उपरांत टॅस्ट पंगडाची कॅप्टनशीप शान मसून आनी टी-20 पंगडाची कॅप्टनशीप शाहीन आफ्रिदीक दिल्ली.
बाबराच्या कॅप्टनशीप खाला पाकिस्तान पंगड वन-डे आनी टी-20 क्रमवारींत पयल्या नंबराचेर पावल्ली. ताच्या फुडारपणा खाला पाकिस्तान 2022 वर्सा टी-20 वर्ल्ड कपाचे फायनलींत पावल्लो मात इंग्लंडा कडल्यान तांका हार खावची पडल्ली. शाहीन आफ्रिदीच्या कॅप्टनशीप खाला पाकिस्तानाक न्युझिलंडा कडल्यान पांच मॅचींचे टी-20 माळेंत 4-1 अशी हार खावची पडली. दुसरे वटेन शान मसूद हाच्या कॅप्टनशीप खाला पाकिस्तानाक ऑस्टॅलिये आड टॅस्ट मॅचीत 3-0 अशी हार खावची पडली.
पाकिस्तानी क्रिेकेट बोर्डान सोशल मीडिया प्लॅटफॉर्म एक्साचेर एक व्हिडिओ शॅर करून बाबर आझमाक वन-डे आनी टी-20 पंगडाचो कॅप्टन केल्ल्याचें जाहीर केलें.
निवड समितीच्या शिफारसी उपरांत बोर्डाचो अध्यक्ष मोहसीन नकवीन बाबर आझमाक पाकिस्तानी क्रिकेट पंगडाचो मुखेली म्हणून नियुक्त केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.