भांगरभूंय | प्रतिनिधी
मडगांव, प्रतिनिधी : बाणावले मतदारसंघांतल्या चडश्या दर्यादेगांचेर रस्ताद सुण्यांचे पर्यटकांक बरेच त्रास सोंसचे पडटात. सुणे चाबपाच्यो घडणुको वाडिल्ल्यान जिल्होधिकार्यांनी बसकाय घेतिल्ली. आतां मिशन रेबिज आनी संवसारीक पशुवैजकी सेवा हांच्या जोड पालवान रस्ताद सुण्यांक धरून तांचें निर्बिजीकरण आनी लसीकरणाची प्रक्रिया सुरु केल्या.
फाटल्या कांय म्हयन्यांनी बाणावले, कोलवें, केळशी ह्या दर्यादेग वाठारांनी रस्ताद सुणे लोकांक बरेच त्रास करतात. कांय जाणांक सुणे चाबपाच्यो घडणुकोय घडल्यात. बाणावलेचे आमदार व्हेंझी व्हिएगस हांणी पशुवैजकी अधिकारी आनी हेर अधिकार्यां सयत बसका घेतिल्ली. जाल्यार केळशी, सुरावली सरपंचांनी जिल्होधिकार्यांक निवेदन दिवन हे विशीं सुण्यां खातीर शेल्टर होम उबारपाची मागणी केल्ली. ते प्रमाण मिशन रेबिज आनी संवसारीक पशुवैजकी सेवा हांच्या सहकार्यान बाणावले, कोलवा वाठारांत रस्ताद सुण्यांक धरून त्याच्या निर्बिजीकरणाक सुरवात केल्या. ताका लागून फुडाराक सुण्यांचो आंकडो उणो जातलो.
डॉ. स्टेसी हांणी सांगलें: दक्षीण गोंयच्या दर्यादेगांचेर कांय जाणांक रस्ताद सुणे चाविल्ल्याच्यो घडणुको घडल्यात. सध्या शॅक्स बंद आशिल्ल्यान सुण्यांक कांयच खावपाक मेळना. ताका लागून ह्या काळांत सुण्यांक खावपाक दिवन तांका धरप सोंपे जातलें. ताका लागून ह्या काळाची निवड केल्या. ह्या भागांत देडशें ते २०० रस्ताद सुणे आसतले. त्या सगळ्यांक धरून निर्बिजीकरण करतले. दर सप्तकांतल्या बिरेस्तारा सकाळच्या वेळार मोहीम चालीक लायतले.
आयज सकाळीं णव सुण्यांक धरले. आमदार व्हेंझी हांणी मिशन रेबिज आनी पशुवैजकी सेवा पंगडाक येवकार दिवन गरजेचें सहकार्य दितले अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
