भांगरभूंय | प्रतिनिधी
मडगांव, प्रतिनिधी : बाणावले धनयाच्या विस्वासू कर्मचार्यानूच ३.२७ कोटींची तोपी घाल्ल्याची घडणूक घडली. हे विशीं मंजुनाथ मळकर्णेंकार हांणी कोलवा पुलिशेंत कागाळ केल्या. पुलिसांनी अब्दुल काझी (३५, रा. आकें, मडगांव) आनी सिकंदर जनरल स्टोअर्स चिंबल हांचे आड फटींपणा केल्ल्याचो गुन्यांव दाखल केला.
मेळिल्ले म्हायती प्रमाण, कागाळदार मंजुनाथ मळकर्णेंकार हांचें मळकर्णेकर ट्रेडर्स म्हणून ‘स्टॉकीस्ट’ नांवाचें दुकान आसा. तातूंत अब्दुल करीम काझी हो वेवस्थापक म्हणून काम करतालो. अब्दुल हाणें पणजी चिंबला सिकंदर जनरल स्टोअर्सा कडेन प्लान करून ट्रेडर्सचो सिगारेटींचो स्टॉक उण्या किंमतीक विकलो. हो प्रकार २०२३ सावन आतां मेरेन वेवस्थापक काझी हांचे सयत सिकंदर जनरल स्टोअरा वतीन चालू आशिल्लो. ह्या घोटाळ्याची म्हायती धनी मंजुनाथ हांकां मेळटांच तांणी कोलवा पुलिशेंत कागाळ नोंद केली. स्टॉक उण्या दरांत दिवन आनी निधीचो अपहार करून दुबावितान ३ कोटी २७ लाखांची तोपी घातिल्ल्याचें कागाळींत म्हणलां.
कोलवा पुलिसांनी चवकशी करून दुबावीत अब्दुल काझी आनी सिकंदर जनरल स्टोअर्स चिंबल हांचे आड विस्वासघात करून अर्थीक फटींगपणा केल्ल्याचो गुन्यांव नोंद केला. हे विशीं कोलवा पुलीस निरीक्षक सतीश पडवळकार हांच्या मार्गदर्शनाखाला पुलीस उपनिरीक्षक दीपा देईकार फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
