भांगरभूंय | प्रतिनिधी
बाणावले पुराचो धोको कायम
मडगांव, प्रतिनिधी: बाणावलेच्या वेस्टर्न बायपासचें काम स्टील्टचे जावपा खातीर केल्ले यत्न अयेसस्वी थारल्यात. सध्या सुरु आशिल्लें काम आडावपाक शकना. मात धाकट्या पुलांची रुंदाय वाडोवन नवे तरेन बांदकाम करतात. माती राशीक मारिल्ल्यान पावसांतल्या हुंवाराचो धोको तसोच कायम आसा, असो भंय आमदार व्हेंझी व्हिएगस हांणी उक्तायला.
बाणावले मतदारसंघांतल्या वेस्टर्न बायपासच्या कामा लागसारा तळेबांध तळ्या कडल्या कल्व्हर्टच्या कामांची सुरुवात शुक्रारा जाली. ह्या वेळार आमदार व्हिएगस हांणी, वेस्टर्न बायपास हो स्टील्टार जावचे खातीर बरेच यत्न केले. विधानसभेंतूय आवाज केलो, तेन्ना गरजेची साथ मेळूंक ना. ताका लागून सभाघरांत आमदारूय बाणावलेचो वेस्टर्न बायपास स्टील्ट पूल उबारपाक इत्सूक ना अशें दिसून आयलें. सध्या वेस्टर्न बायपासचे जें काम सुरु आसा, तें आडावपाक शकना. मात आतां ह्या वेस्टर्न बायपासाच्या कामाक लागून बाणावलेचे गांव पावसांत उदका पोंदाक वयचे न्हय देखून गरजेचे उपाय करपाची गरज आसा. ते नदरेन काम सुरू केलां ते प्रमाण आतां तळेबांध हांगच्या हुंवाराचें उदक सांठोन रावपी सुवाते वयल्यान उदक वचपाक धाकट्या पुलाची निर्मीती करतले. बांदकाम खात्यान ह्या कल्व्हर्टच्या कामांचे आदेश जारी जाल्ल्यान लोकसभा वेंचणुकेचे फाटभूंयेर ह्या कामांची सुरवात बेगीनूच जावपाची आसा. तशेंच तळेबांध वाठारांतल्यान आनीक तीन सुवातां वयल्यान उदक न्हंयचे दिकेन व्हांवपाक वाटो आसात. त्या प्रवाहाक निर्माण जावपी आडखळीय उदकास्रोत खातें नितळसाण करपाचें काम हातांत घेवन पयस करतलें, अशेंय तांणी स्पश्ट केलें.
बाणावले वेस्टर्न बायपास स्टील्टाचेर करपाची मागणी करूनय मातयेच्यो राशी मारून काम केलें. हाचो धोको बाणावलेच्या खोल भागांतल्या वसणुकेंतल्या कायम रावतले. पावसाच्या दिसांनी पावसाचो नेट आसतना आनी भरतीच्या वेळार एकूच जाल्यार हुंवाराचो धोको आनीक वाडपाक शकता. खंयच्याच नियोजना बगर वेस्टर्न बायपासची निर्मिती करतात. ताका लागून फुडाराक खुबश्या समस्यांक तोंड दिवचें पडटलें. सध्या जे उपाय करपाक जाय ते करतात, अशें आमदार व्हेंझी व्हिएगस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
