भांगरभूंय | प्रतिनिधी
माटोळेक लागपी सामानाच्या मोलांत सुमारा भायर वाड
फोंडें: बाणस्तारी चवथीच्या बाजाराक व्हड प्रमाणांत गर्दी दिसून आयली. बाणस्तारी भरता तो चवथीचो बाजार प्रसिद्ध आशिल्ल्यान खूबशे कडच्यान लोकांनी बाजारांत येवन गर्दी केली. आयज शुक्रारा लेगीत गर्दी जावपाची शक्यताय आसून लाखांनी रुपयांची उलाढाल अपेक्षीत आसा.
बाणस्तारी परंपरीक चवथीच्या मोटाळी बाजाराक गिरायकांनी खरेदी खातीर व्हड प्रमाणांत गर्दी केली. माटोळी खातीर लागपी कात्रे, नाल्लाच्यो पेंडी, विवीध प्रकारची बागायती फळां, रान फळां, केळीचे घड, केळीचीं पानां आनी हेर सगले तरेचे साहित्य बाजारांत उपलब्ध आशिल्लें. खूबश्या विक्रेत्यांनी माटोळीक लागता तें सामान हाडिल्लें.
पणजी, म्हापशें, मडगांव, फोंडें, वास्को वाठारांतल्या खूबश्या वेपार्यांनी बाजारांत मोटाळीचें साहित्य उपलब्ध केलां. सावयवेरें, केरी, कुंडय, प्रियोळ, वेलींग वाठारांतल्या बागायतदारांनी साहित्य विक्रे खातीर हाडिल्लें.
फाटल्या कांय दिसां सावन पडिल्ल्या उटंगाराच्या पावसाक लागून बाजारांतल्या साहित्याच्या मोलांत वाड दिसून आयली. माटोळीच्या बाजारांत गांवठी कात्रे उण्या प्रमाणांत विक्रेक आसून ताचें मोल सुमारा भायर वाडिल्ल्याचें दिसून आयलें. कात्रे, कांगला, तोरींग आनी हेर फळां उण्यांत उणी 100 रुपया दरांत विक्री करताले. तातूंत चवथीच्या दिसांनी लागपी केळीचीं पानां 400 रुपयांक शंबर, रानफुलां आनी हेर फळां 50 रुपया, आठ नाल्लाची पेंड 1000 रुपया, सुपारीच्या कात्र्याचें मोल 1200 आनी हेर साहित्य म्हारग दरांत विक्री करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
