भांगरभूंय | प्रतिनिधी
फोंडेंः बाणस्तारी दुचाकी आडायली म्हूण सहायक येरादारी उपनिरीक्षकाक मारपेट करपी काॅन्स्टेबल रजत आडपयकार हाका सेवेंतल्यान निलंबीत केला. ताचे आड गुन्यांवूय दाखल केला. दक्षीण गोंय अधिक्षक सुनीता सावंत हांणी काल रातीं हो आदेश काडलो.
मजगतीं, पुलिसांनी दिल्ले म्हायती प्रमाण, बाणस्तारी ड्युटेर आशिल्ले येरादारी पुलीस सहायक उपनिरीक्षक विवेक फडते हांकां रजत आडपयकार ह्या पुलीस काॅस्टेबलान मारपेट करपाचो प्रकार दनपरां घडिल्लो. स्वता मारपेट करून उपरांत उपनिरीक्षकान पयलीं आपणाक मारलो असो व्हिडियोय घालून ताणें स्वताक वाटावपाचो यत्न केलो. मारपेट करपी रजत हो मुरगांव पुलीस स्टेशनाचो कर्मचारी. हॅल्मेट आनी बुलेटीक हारसो नाशिल्ल्यान तालांव दिवपाक गेल्ल्या फडते हांकां मारपेट केल्ल्याचें पुलीस तपासांत उक्तडार आयलां. मारपेट करपी रजत आनी हेर कांय जाणां आड म्हाड्डोळ पुलीस स्टेशनांत कागाळ नोंद जाल्या.
पुलिसांनी दिल्ले म्हायती प्रमाण, बाणस्तारी नेम माड्डुपी ड्रायव्हरांक तालांव दिवपाक पुलीस उबे राविल्ले. तातूंत हेल्मेट, हारसो ना म्हूण फडते हांणी रजताची बुलेट आडायली. तेन्ना ती चलोवप्यान ताका मारपाक सुरवात केली. फाटल्यान मोटारींतल्यान आयिल्ल्या रजत आडपयकाराच्या कुटुंबानूय फडते हाका मारलो. हें प्रकरण भुजपाक शकता ह्या भंयान रजतान पयलीं फडतेन आपणाक मारलो, अशें सांगलें. ही मारपेट पळोवन थंय खूब लोक जमिल्ले. फोंडें येरादारी निरिक्षक कृष्णा सिनारी आनी हेर कर्मचाऱ्यांनी म्हाड्डोळ पुलीस स्टेशनांत धांव घेतली. मारपेट जाल्ल्या फडते हांकां जीएमसींत व्हेले उपरांत सांजवेळा उसरां तांकां घरा धाडले.
म्हाड्डोळाचे निरिक्षक योगेश सावंत हांणी चवकशी सुरू करतकच बुलेट चलोवपी हालींच लागिल्लो नवो काॅन्स्टेबल अशें कळ्ळें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
