भांगरभूंय | प्रतिनिधी
मुखेल सचीव, रान खातें आनी हेरांक निवेदन
म्हापशें: बागा हांगासरल्या पुनर्रोपण केल्ल्या रुखाची नासधूस करपाचो यत्न केल्ल्या प्रकरणांत कळंगूट मतदारसंघ मंचा वतीन (सीसीए) राज्याचे मुखेल सचीव, रान खातें आनी हेर संबंदीत प्राधिकरणांक निवेदन सादर केलां. हो 200 वर्सां पयलींचो पोरणो रूख बांदकाम वेवसायीक काडपाचो यत्न करीत आशिल्ल्याचो आरोप ह्या निवेदनांतल्यान केला. ह्या हुमटून उडयिल्ल्या रुखाचें फाटल्या जुलय 2023 वर्सा पुनर्रोपण केल्लें.
खोब्रावाडो, बागा हांगासरल्या सर्वे क्रमांक 214/6 आनी 214/6अ हे सुवातेत बांदकाम प्रकल्पाच्या नांवा खाला आमच्या पोरण्या पुनर्रोपण केल्ल्या रुखाचें लुकसाण करपा खातीर विकासक शंशाक जैन आनी अखील गुप्ता हांणी नियोजनबद्द रितीन कृती चलयल्या असो दावो मंचान केला.
विकासक शंशाक जैन हांणी सुरवातेक झाडाची मुळां कापपाचो आनी आतां पुनर्रापण केल्ल्या रुखाचे सरभोंवतणी लोखंडाच्या दुरगान झाकपाचो प्रकार चलयला. हाका लागून फक्त झाडाचे भलायकेक धोको दिनात जाल्यार समाजाच्या भावनांचोय अवमान करतात.
आमच्या समुदायाचे हे प्रतिश्ठीत प्रतीक आसून ताका सांस्कृतीक, इतिहासीक आनी पर्यावरणीय म्हत्व आसा. ताचो इबाड जावंक दिवप ही एक गंभीर चूक थारतली. ह्या सैमीक दायजाक सांबाळपाक प्राधान्य दिवपी पर्यायी उपायांचो विचार जावंक जाय. विकासाच्या गरजांची पुरवण करतना झाडाचे संरक्षण करपाचे खूबशे मार्ग आसात.
पर्यावरण तज्ञां कडेन सल्लो मसलत करप, मूळ आडमेळ्यांची अंमलबजावणी करप आनी झाडा भोंवतणी पाचवी सुवात तयार करप हे काय उपाय करप शक्य आसा. ह्या प्रकल्पाक बाह्य विकास आराखड्या प्रमाण मान्यताय दिल्ल्यान आतां त्यो मान्यता रद्द करच्यो अशी मागणी मंचाचे अध्यक्ष प्रेमानंद दिवकार हांणी केल्या.
पुनर्रोपण केल्लें पोरणें झाड मारपाचो हो सुनियोजीत कट आसा. ओडीपी 2025 आड दाखल केल्ले जनहीत याचिकांचेर उच्च न्यायालयान आदेश जारी केला. ताका लागून न्यायालयाच्या निर्देशा प्रमाण आमी प्राधिकरणांक ह्या प्रकल्पांचो विकास थांबाेवपाची विनंती करतात. ह्या प्रकल्पांक कसलेंच भोगवटा प्रमाण दिवचे नात. कारण आमची कागाळ शंशाक जैन आनी अखील गुप्ता हांच्या दोनूय प्रकल्पां आड आसा अशें दिवकार हांणी निवेदनांत नमूद केलां.
मजगतीं, फाटल्या 5 जून दिसा एका रिसॉर्टाच्या बांदकामदारा कडल्यान मुळां कापिल्ल्यान हो रूख कोसळिल्लो. उपरांत ग्रामस्थ आनी कळंगूट मतदारसंघ मंचान हो रूख बेकायदो मारिल्ल्याचो दावो करून तो पुनर्रोपण करपाची मागणी केल्ली. उपरांत हें झाड 28 जुलय दिसा तज्ञांचे मजतीन आनी क्रेनाच्या आदारान पुनर्रोपण केल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
