भांगरभूंय | प्रतिनिधी
पणजी ः गोंयात ल्हान व्हड अपघातांचे सत्र सुरुच आसा. ते प्रमाण अपघातांचो आंकडो बरोच वाडत आसा. आयज सकाळीं बांबोळें जाल्ल्या अपघातांत पांच गाडयो एकामेकांक आपटल्यो. ह्या अपघातांत कोणाक कांय जावंक ना. पूण, वाहनांचें व्हड लुकसाण जालां.
तीन मोटारी, एक टेम्पो आनी कदंबाची इलेक्ट्रीक प्रवासी बस अश्यो पांच गाडयो एका फाटल्यान एक राष्ट्रीय म्हामार्गा वयल्यान पणजे वटेन येताल्यो. बांबोळें सावन नियाज हॉटेल कडेन वतना आशिल्ल्या ओल्ता वयल्या देंवतेचेर हो अपघात जालो. फुडें आशिल्ले कारीक फाटल्यान येवपी टेम्पोन धपको दिलो. त्या टेम्पोक फाटल्यान एक कार आपटली. तिका फाटल्यान आनीक एक कारीन धपको दिलो. ह्या दोनूय गाडयांच्या शेवटाक इलेक्ट्रीक प्रवासी बस आशिल्ली. तिणें निमाणे कारीक धपको दिलो. सुदैवान ह्या अपघातांत कोणाक दुखापत जावंक ना. पूण पांचूय गाडयांचें लुकसाण जालां. हो अपघात नेमको कसो जालो हाचो पुलीस तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
