भांगरभूंय | प्रतिनिधी
फोंडे, प्रतिनिधी ः बांदोडेंच्या व्यंकटेश लीला हॉटेला मुखारच्या उड्डाण पुलाच्या धोकादायक ओल्ताचेर बिरेस्तारा मध्यानरातीं 3 वरांचेर कंटेनर उमथलो. तो कुंडय सावन बंगळुरूक वतालो. ड्रायव्हराक काय जावंक ना. ह्याच सुवातेर आयज मेरेन 8 परस चड गाडयांक अपघात जाला.
मेळिल्ले म्हायती प्रमाण, केए- 52- बी- 6130 क्रमांकाचो कंटेनर बंगळुरू वतालो. उड्डाण पुलाच्या धोकादायक ओल्ताचेर ड्रायव्हराचो गाडये वयलो ताबो गेल्ल्यान कंटेनर उमथलो. अपघाताची म्हायती मेळ्ळ्या उपरांत फोंडें पुलीस स्टेशनाचे हवालदार सज्योत सावंत हांणी घडणूक सुवातेर येवन पंचनामो केलो.
ह्या ओल्ताचेर फाटल्या 2 वर्सांत आठा परस चड कंटेनर आनी हेर गाडयो कोसळ्ळ्यात. देंवतेचेर अचकीत वळण पळोवन ड्रायव्हरांचो गाडये वयले ताबो वता. देखून थंय अशें अपघात जातात. रातच्या वेळार तर अशें प्रकार चड घडटात, अशें थळाव्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
