भांगरभूंय | प्रतिनिधी
येजमान बांगलादेश आनी न्युझिलॅण्ड ह्या पंगडां मदीं दोन टॅस्टींचे माळेचे पयले मॅचीक सिलहटांत सुरवात जाली. काल पयल्या दिसा बांगलादेशान टॉस जिखून पयलीं बॅटींग करपाचो निर्णय घेतलो आनी खेळ थांबलो त्या वेळार 9 विकेटी वगडावन 310 धांवड्यो केल्यो. महमुदुल हसनान अर्द शेंकडो नोंदयलो जाल्यार न्युझिलॅण्डाच्या ग्लॅन फिलिप्सान चार विकेटी घेतल्यो.
पयलीं बॅटींग करपी बांगलादेशाची सुरवात बरी जाली ना. 39च्या स्कोराचेर ओपनर झाकिर हसन बाद जालो. ताका अजाज पटेलान बाद केलो. महमुदुल हसन जॉयान नजमूल हसन शांतो वांगडा मेळून डाव मुखार व्हेलो. पूण, 100चो आंकडो हुपल्या उपरांत रोखडोच नजमूल हसन 37 धांवड्यो करून बाद जालो. ताका फिलिप्सान बाद केलो. जेवणाच्या विसवा मेरेन बांगलादेशाचो स्कोर 2 बाद 104 आशिल्लो.
102चेर दुसरी विकेट पडल्या उपरांत महमुदूल हसनान बांगलादेशाचो डाव मुखार व्हेलो. ताणें दुसऱ्या सत्रांत आपलो अर्द शेंकडो पुर्ण केलो. उपरांत मोमिनूला वांगडा अर्द शेंकड्याची भागिदारी केली. दोगांयनी तिसरे विकेटी खातीर 88 धांवड्यांची भागिदारी केली. हसनान टॅस्टींतलो चवथो अर्द शेंकडो पुर्ण केलो.
न्युझिलॅण्डा वतीन फिलिप्सान चार विकेटी घेतल्यो. कायल जेमिसन आनी अजाज पटेल हांकां दरेकी दोन विकेटी फावो जाल्यो. ईश सोधीक एक येस मेळ्ळें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
