भांगरभूंय | प्रतिनिधी
संवसारीक वस्ताद इंग्लंड पंगडाक बांगलादेशान धपको दिलो. बांगलादेशान घरच्या मैदानाचेर खेळटना संवसारीक वस्ताद इंग्लंडाचो टी-20 माळेंत धूप केलो. तिसरे आनी निमाणे मॅचींत बांगलादेशान 16 धांवड्यांनी जैत जोडलें. हाचे सयत बांगलादेशान माळ 3-0 फरकान बोल्सांत उडयली.
काल खेळिल्ले तिसरे मॅचींत पयलीं बॅटींग करतना बांगलादेशान 2 विकेटी वगडावन 158 धांवड्यो केल्यो. ताका प्रत्युत्त दितना संवसारीक वस्ताद इंग्लंडाक फकत 142 धांवड्यां मेरेन मजल मारप शक्य जालें.
बांगलादेश आनी इंग्लंड ह्या पंगडां मदीं पयलेच खेपे द्विपक्षीय माळ जाली. बांगलादेशान पयलेच खेपे जबरदस्त प्रदर्शन करतना इंग्लंडाक हारयलो. टी-20 क्रिकेट सर्तीच्या इतिहासांत इंग्लंडाक तिसरे खेपे क्लीन स्विपाक तोंड दिवचें पडलें. हाचे पयलीं 2014त ऑस्ट्रेलियेन आनी 2016त दक्षीण आफ्रिकेन अशी कामगिरी केल्ली.
बांगलादेशान चट्टोगॉंगांत जाल्ली पयली टी-20 मॅच 6 विकेटींनी जिखिल्ली. ढाकांत जाल्ले दुसरे मॅचींत बांगलादेशान चार विकेटींनी जिखिल्ली.
तिसरे मॅचीचो हिरो लिटन दास थारलो. ताणें आक्रमक बॅटींग करतना 10 चवक्यांचे आनी एका सक्याचे मजतीन 73 धांवड्यो केल्यो. ताचे खेरीत बांगलादेशा वतीन नजमूल हुसेन शांतोन नाबाद 47 धांवड्यो केल्यो. आदिल रशीद आनी क्रिस जॉर्डन हांणी दरेकी एक विकेट घेतली.
मोखीचो फाटलाव करपी इंग्लंडाची सुरवात बाबत जाली. फिल सॉल्ट डावाच्या तिसऱ्या बॉलाचेर गोल्डन डकाचेर बाद जालो. ओपनर डॅव्हिड मलानान सगल्यांत चड 53 धांवड्यो केल्यो आनी जोस बटलरान 40 धांवड्यो केल्यो. तस्कीन अहमदान सगल्यांत चड दोन विकेटी घेतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
