भांगरभूंय | प्रतिनिधी
बांगलादेशान संवसारीक वस्ताद इंग्लंडाक टी-20 मॅचींत 6 विकेटींनी हारयलो. पयली बॅटींग करपाचो निर्णय घेवपी इंग्लंडान 20 ओव्हरींनी 6 विकेटी वगडावन 156 धांवड्यो केल्यो. बांगलादेशान 18 ओव्हरींनी आनी फकत चार विकेटी वगडावन मोख मेळयली.
बांगलादेशा वतीन नजमूल हसन शांतोन 51 धांवड्यांची खेळी केली. शाकिब अल हसनान 34 आनी अफिफ होसैनान नाबाद 15 धांवड्यो करून पंगडाचें जैत निश्चीत केलें.
टॉस हारल्या उपरांत पयलीं बॅटींग करपी इंग्लंडाचो मुखेली जोस बटलर आनी फिल सॉल्ट हांणी बरी सुरवात करून दिली. दोगांयनी पयले विकेटी खातीर 10 ओव्हरींनी 80 धांवड्यो केल्यो. सॉल्ट 38 धांवड्यो करून बाद जालो. तो बाद जाल्या उपरांत बटलर एके वटेन उबो उरलो आनी दुसरे वटेच्यान विकेटी पडत गेल्यो.
बटलर 67 धांवड्यो करून बाद जालो. ताचे खेरीत बेन डकेटान 20, डॅव्हिड मलानान 4, सॅम करनान 6 आनी क्रिस वोक्सान एक धांवडी केली.
बांगलादेशा वतीन हसन मसमूदान सगल्यांत चड चार विकेटी घेतल्यो. नसुम अहमद, तस्कीन अहमद, मुस्ताफिजुर रहमान आनी शाकिब अल हसन हांणी दरेकी एक विकेट घेतली.
मोखीचो फाटलाव करपी बांगलादेशान जलद सुरवात केली. लिट्टन दास (12) आनी रोनी तालुकदार (21) हांणी 33 धांवड्यांची भागिदारी केली. चवथे ओव्हरींत रोनी आनी पांचवे ओव्हरींत लिट्टन दास बाद जालो. तिसरे सुवातेर आयिल्ल्या नजमूल हसन शांतो (51) आनी टॉडी ह्रिदॉय (24) हांणी तिसरे विकेटी खातीर 39 बॉलांनी 65 धांवड्यांची भागिदारी केली.
शांतो आनी ह्रिदॉय बाद जाल्या उपरांत शाकिब आनी अफीफ हांणी 34 बॉलांनी 46 धांवड्यांची नाबाद भागिदारी करून 12 बॉल बाकी दवरून जैत जोडलें.
इंग्लंडा वतीन जोफ्रा आर्चर, आदिल रशीद, मार्क वूड आनी मोईन अली हांणी दरेकी 1 विकेट घेतली. 51 धांवड्यांची खेळी करपी शांतोची मॅन ऑफ द मॅच पुरस्कारा खातीर निवड जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.