भांगरभूंय | प्रतिनिधी
खबरां संस्था
ढाकाः तीन वन-डे माळेचे शेर ए बांगला स्टेडियमचारे जाल्ले पयले मॅचींत बांगलादेशान भारताक 1 विकेटीन हारयलें. हे मॅचींत पयलीं बॅटींग करून भारतान 41.2 ओव्हरींत 186 धांवड्यो केल्यो. बांगलादेशान 187 धांवड्याचें लक्ष्य 46वे ओव्हरींत हातास्तना 9 आवट 187 धांवड्यो केल्यो. मेहदी हसन मिराजाची 38 धांवड्यांची नाबाद खेळी निर्णायक थारली.
भारतान टॉस जिखून पयलीं खेळपाचें थारायलें. मात डावाची सुरवात बाबत जाली. शिखर धनवाच्या रुपान भारताक पयलो धपको बसलो. 17 बॉलात 7 धांवड्यो करून तो बाद जालो. विटार कोहली आनी रोहीत शर्मा भारताचो डाव साल्वार करतले अशें दिसतालें. मात स्पीनर शाकीब अल हसनान तांकां आवट करून पॅव्हेलियनांत धाडलें. रोहीत 27 जाल्यार विराट फकत 9 धांवड्यो करपाक शकलो.
हे मॅचींत विकेटकिपींग करपी केएल राहुलान भारताचो डाव साल्वार केलो. ताणे 70 बॉलांत 5 चौके आनी 4 सक्यांनी 73 धांवड्यो केल्यो. इबादत हसनाचे बॉलिंगेचर तो कॅच आवट जालो. श्रेयस अय्यरान 24 आनी वाशिंग्टन सुंदरान 19 धांवड्यांचें योगदान दिलें. भारताच्या हेर बॅट्समनाकं दोन अंकी धांवड्यो करपाक जमलें ना. बांगलादेशा कडल्यान शाकिबान सगल्यांत बरी बॉलींग करून 10 ओव्हरींत 36 धांवड्यो दिवंन 5 विकेटी घेतल्यो. हातूंत ताचो दोन डॉट ओव्हरी आशिल्ल्यो. ताचे बॉलिंगे सामकार भारतीय बॅट्समन टिकाव धरपाक शकले नात.
वन-डेंत शाकिब अल हसनान विराट आनी रोहीत शर्माक एकेच ओव्हरींत बाद करपाची कामगिरी दुसरे फावट केली. हाचे पयलीं 2010 वर्सा आशिया करंड सर्तीचे मॅचींत ताणे 15वे ओव्हरींत ही कामगिरी केल्ली. वन-डेंत रोहीत आनी कोहलीक एके ओव्हरींत दोन फावट बाद करपी शाकीब हो पयलो बांगलादेशी बॉलर थारला.
जैता खातीर 187 धांवड्यो करपा खातीर मैदानांत आयिल्ल्या बांगलादेशाची सुरवात लेगीत भारता भशेन बाबत जाली. पयले ओव्हरीच्या पयल्याच बॉलाचेर नजमुल हुसेन शांतो शून्याचेर आवट जालो. ते उपरांत अनामूल हक (14) लेगीत रोखडोच बाद जालो. कॅप्टन लिटन दास आनी शाकिबान डाव साल्वार केलो. तांणी तिसरे विकेटी खातीर 48 धांवड्यांची भागिदारी केली. लिटन दासान 63 बॉलांत 41 धांवड्यो केल्यो. शाकिबान 29 धांवड्यांचें योगदान दिलें. भारता वतीन मोहम्मद सिराजान तीन विकेटी घेतल्यो.
36 धांवड्यांत 9 खेळगडे बाद जाल्ल्यान भारताक हे मॅचींत जैत मेळोवपाची संद आशिल्ली मात मेहदी हसन मिराजान भारताक ती संद दिली ना. मित्साफिजूर रेहमानाक वांगडा घेवन ताणे सादूरताय बाळगून विकेट पडपाक दिली ना. 4 चौके आनी 2 सक्यांनी ताणे 39 बॉलांत नाबद 38 धांवड्यो करून पंगडाक जैत मेळोवन दिलें. रेहमानान 11 बॉलांत नाबाद 10 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
