भांगरभूंय | प्रतिनिधी
येजमान बांगलादेशान न्युझिलॅण्डा आडची पयली टॅस्ट 150 धांवड्यांनी जिखली. बांगलादेशाच्या टॅस्ट इतिहासांत घरच्या मैदानाचेर न्युझिलॅण्डा आड मेळयिल्लें पयलें जैत थारलें. ह्या जैतान बांगलादेशान दोन मॅचींचे माळेंत 1-0 अशी आघाडी घेतली.
सिलहट आंतरराष्ट्रीय क्रिकेट स्टेडियमाचेर चालू आशिल्ले मॅचींत न्युझिलॅण्डान काल 7 बाद 113 धांवड्यां वयल्यान मुखार खेळपाक सुरवात केली आनी 181 धांवड्यां मेरेन मजल मारली. बांगलादेश फाटल्या 24 म्हयन्यांनी दुसरे खेपे न्युझिलॅण्डा आड जैत जोडपाक येसस्वी थारला.
पोरूं वर्सांचे सुरवातीक न्युझिलॅण्डाक ताच्याच मैदानाचेर 8 विकेटींनी हारयिल्लो. माळ 1-1 अशी बरोबरींत उरिल्ली.
बांगलादेशाक जैता खातीर निमाण्या दिसा तीन विकेटींची गरज आशिल्ली. पांचव्या दिसा पयलें येस नईम इस्लामान डॅरील मिचेलाक बाद करून दिलें. मिचेलान 120 बॉलांनी 58 धांवड्यो केल्यो. न्युझिलॅण्डाच्या डावांतलो हो एकूच अर्द शेंकडो आशिल्लो.
निमाण्यो दोन विकेटी तैजुल इस्लामान मेळयल्यो. ताणें पयलीं टिम सावथीक बाद केलो. जाकीर हसनान ताची कॅच धरली. सावदीन 24 बॉलांनी 34 धांवड्यो केल्यो. इस्लामान उपरांत ईश सोधीक तंबूंत धाडलो. ताची कॅच लेगीत हसनान धरली.
चवथ्या दिसाचो खेळ सोंपिल्लो त्या वेळार न्युझिलॅण्डाक 49 ओव्हरींनी 7 विकेटी वगडावन 113 धांवड्यो केल्ल्यो. न्युझिलॅण्डाक निमाण्या दिसा जैता खातीर 218 धांवड्यांची गरज आशिल्ली.
ते पयलीं बांगलादेशान पयल्या डावांत 310 धांवड्यो आनी दुसऱ्या डावांत 338 धांवड्यो केल्ल्यो. जाल्यार न्युझिलॅण्डान पयल्या डावांत 317 धांवड्यो केल्ल्यो.
बांगलादेशा वतीन दुसऱ्या डावांत मुखेली नजमूल हुसैन शांतोन शेंकडो मारिल्लो. ताणें 198 बॉलांनी 105 धांवड्यो केल्ल्यो. शांतो खेरीत मुशफिकूर रहीमान 67 आनी मेहदी हसन मिराजान 50 धांवड्याची खेळी करून पंगडाक बरे स्थितींत हाडिल्लो. न्युझिलॅण्डाक जैता खातीर 332 धांवड्यांची मोख मेळिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
