भांगरभूंय | प्रतिनिधी
मंगळुरूंत मुखेल सोयरे म्हूण मुख्यमंत्री डॉ. प्रमोद सावंत रावतले हाजीर
मंगळुरू: शक्तीनगर मंगळूरच्या विश्व कोंकणी केंद्राच्या संकुलांत बुधवार ता. 8 फेब्रुवारी दिसा सांजवेळां 5 वरांचेर जावपी सुवाळ्यांत केंद्राचे संस्थापक कोंकणी सरदार बस्ती वामन शणै हांच्या सुमार 8 लाख रुपया खर्चून उबारिल्ल्या पितुळच्या पुतळ्याचें गोंयचे मुख्यमंत्री डॉ. प्रमोद सावंत हांचे हस्तुकीं अनावरण जातलें.
तेच कार्यावळींत गोंयचे आदले मुख्यमंत्री मनोहर पर्रीकार हांच्या भाव चित्राचें, तशेंच श्रीमती इंदिरा आनी श्री. पी. गडाय लक्षमण पै श्रेश्त्रा केंद्राचें आनी श्रीमती सीता आनी दर्बे रमानाथ नायक मैरा प्रदर्शनी सभांगणाचेंय तांचेच हस्तुकीं उक्तावण जातलें, अशी म्हायती केंद्राचे अध्यक्ष नंदगोपाळ शणै हांणी दिली.
विश्व कोंकणी केंद्र साहित्य, संगीत, कला हाचे वांगडाच देशभरांत कोंकणी भास उलोवपी मनशाचो व्यक्तिमत्व विकास घडोवन हाडपाचे नदरेनय वावर करता. कोंकणी मनीस जंय जंय ज्या ज्या मळाचेर प्रवेश करतलो थंय तो गुणवत्तापूर्ण म्हणून नांवारुपाक येवचो हो हेतू बाळगूनच काम करता, अशेंय तांणी सांगलें.
कोंकणी भास आनी संस्कृती प्रतिश्ठानाचे अध्यक्ष पी. दयानंद पै हांचे येजमानके खाला जावपी उक्तावण सुवाळ्याक माचयेर मुखेल सोयरे म्हूण गोंयचे मुख्यमंत्री डॉ. प्रमाेद सावंत, मंगळूरचे लोकसभेचे खासदार नळीन कुमार कटील, दक्षीण मंगळूरचे आमदार डी. वेदव्यास कामत, मणिपाल ग्लोबल एज्युकेशनाचे अध्यक्ष टी. वी. मोहनदास, रयान शिक्षण संस्थांच्या समुहाच्यो वेवस्थापकीय संचालक मडाम ग्रेस पिंटो, युके आनी कंपनीचे संस्थापक उल्हास कामत, केंद्राचे अध्यक्ष नंदगोपाळ शणै विद्यार्थी वेतन सचीव प्रदीप जी. पै, भांडारी बी. आर. भट आनी कार्यदर्शी गिरीधर कामत हजर आसतले.
उक्तावण सुवाळ्या पयलीं सकाळच्या सत्रांत वेगळ्यावेगळ्या विशयांचेर चर्चा सत्रांय जातलीं. डॉ. किरण बुडकुले हांचे येजमानके खाला जावपी ‘कोंकणी नाटक-परंपरा, प्योग, नव परिवर्तन ह्या सत्रांत इशा नाडकर्णी, ग्लेनीस मेंडोन्सा डिसोझा, दत्तगुरू जोशी, स्वेतलाना फर्नांडीस आनी सुभाष कमलकार वांटो घेतलीं. मेल्वीन रोड्रिगीश हांचे येजमानके खाला जावपी ‘कोंकणी साहित्य दसकाची प्राप्ती आनी फुडार’ ह्या सत्रांत एच. एम. पेरनेल, अन्वेशा सिंगबाळ, डॉ. हनुमंत चोपडेंकार आनी टिटस नोरोन्हा वांटो घेतलीं.
‘आंतरजाळ कोंकणी नव्यो संकल्पना’ ह्या विशया वेल्या वंदना कामत हांचे अध्यक्षताये खाला जावपी सत्रांत संध्या शणै, बस्ती शोभा शणै, सचित्र शणै, डॉ. विजयालक्ष्मी नायक, गीता नायक आनी मेधा नायक वांटेकार जातलीं. जाल्यार चेतन आचार्य हांचे येजमानके खाला जावपी ‘भाशा तंत्रज्ञान आनी कोंकणी’ ह्या विशया वेल्या सत्रांत रॉयल सिक्वेरा, डॉ. ज्योती पवार आनी कॅरोन माडथा वांटो घेतलीं. ते भायर कवियत्रीच्या भोवभाशीक कवी संमेलनाचेंय आयोजन केलां.
दुसरे दिसा बिरेस्तार ता. 9 दिसा जावपी समारोप सुवाळ्यांत विश्व कोंकणी पुरस्कारांचें वांटप जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
