बळिश्ट हेरगिरी संघटणा देशाक आयज गरजेची

भांगरभूंय | प्रतिनिधी

देशांत आतंक घडोवन हाडचे आदीं स्वरक्षणा खातीर हीं प्रकरणां मुळांतल्यान सोंपोवचे खातीर, हेर देश कितें म्हणटात ताचो विचार करनासतना, त्या देशांत गुप्तहेर संघटणांचो आंवाठ, वावर वाडोवन बळगें दिवप हालींच्या तेंपार चड आवश्यक जाल्लें आसा.

कॅनडांत खलिस्तान समर्थक हरदीप सिंह निज्जराच्या खुनांत भारत सरकाराचे संघटणेचो हात आसा, असो आरोप कॅनडा सरकारान केल्ले कारणान दोनूय देशां मदले राजकी संबंद रसातळाक पावल्यात. आमची गुप्तहेर संघटणा रिसर्च एण्ड एनालायसिल वींग -RAW रॉ- ही थेट देशाच्या प्रधानमंत्र्यांक रिपोर्ट करता, देखून कॅनडा, अमेरिकेन आमच्या प्रधानमंत्र्यां आड आरोप लायल्यात, असो ताचो अर्थ जाता. कॅनडान पुरावे सादर केले नात आनी भारतान आरोप न्हयकारल्यात.
देशविरोधी कारवायो करपी अलगाववाद्यांक, आतंकवाद्यांक स्वदेशांत, विदेशांत प्रत्यक्ष वा अप्रत्यक्ष रितीन सोंपोवपाचें काम अमेरिकेची सीआयए, रशियेची केजीबी, ब्रिटनची एमआय- 6, इस्रायलची मोसाद, चीनची मिनिश्ट्री ऑफ स्टेट सॅक्युरीटी ह्या संघटणांचे गुप्तहेर आनी तांचीं सरकारां करीत आयल्यांत, ताचो एक व्हड सविस्तर इतिहास आसा. विकसीत तंत्रज्ञान, आधुनीक शस्रास्त्रां, अवाढव्य बजेट आनी लाखांनी एजण्टांचें नॅटवर्क आशिल्ली अमेरिकन गुप्तहेर संस्था ‘सीआयए’ची पाताळयंत्री, क्रूर आनी असत्य पातळावपी म्हूण ख्याती आसा. सीआयए वांगडा म्हायतीची देवाण घेवाण करपी इस्रायलची मोसाद तितलीच क्रूर म्हणूं येता.
1972 वर्सा म्युनिक ऑलिंपिकांत भाग घेवपाक गेल्ल्या इस्रायली पंगडांतल्या 11 खेळगड्यांची पॅलेस्टायनी आतंकवाद्यांनी हत्या केल्ली. उपरांत त्या खुन्यांक ते लिपिल्ले त्या देशांत वचून मोसाद एजण्टांनी मारून उडयिल्ले. एरीक बाना आनी डॅनियल क्रेग अभिनीत, स्टीवन स्पीलबर्ग दिग्दर्शीत ‘म्युनिक’ ह्या चित्रपटांत त्या वास्तववादी घडणुकांचें, जशो घडल्यो तशें सविस्तर चित्रण केल्लें आसा. इराणान अणूबॉम्ब तयार करपाची क्षमता आत्मसात केली जाल्यार आपल्या देशाक धोको संभवता म्हूण इस्रायलान 2010 ते 2012 मदीं तांच्या अण्वीक संशोधन करपी चार शास्रज्ञांची हत्या केल्ल्याचे आरोप मोसादाचेर लागिल्ले आसात.
अमेरिकेची सीआयए आतंकवादीच न्हय तर विदेशांत लोकशायी मार्गान वेंचून आयिल्ले विरोधी विचारसरणीच्या जनप्रतिनिधीकूय कसलीय भीड, मुर्वत बाळगिनासतना मारून उडोवपाची खुनशी कर्मां साठ वर्सां आदीं सावन करीत आयल्या.
कोंगोचे लोकशाय मार्गान वेंचून आयिल्ले प्रधानमंत्री पात्रिस लुमुंबा सोवियता वांगडा इश्टागत करपाक उत्सूक दिसले तेन्ना तांचो कांटो काडपाचो सीआयएन थारायलें. लुमुंबान जीव वाटावपाक संयुक्त राष्ट्रसंघाचो भारतीय प्रतिनिधी राजेश्वर दयाळ हाच्या घरांत आस्रय घेतिल्लो. मात तांच्या बंगल्याच्या कंपांवडांतल्यान भायर सरताच 17 जानेवारी 1961 दिसा अमेरिकन आनी बेल्जियन मारेकऱ्यांनी ताका मारून उडयलो हे जगजाहीर आसा. हालीं 2020 वर्सा अमेरिकेन इराणच्या इस्लामीक क्रांतीकारी सुरक्षा गुटाचो मुखेली कासेम सोलेमानी हाका इराकांत ट्रंपाच्या आदेशानुसार क्षेपणास्त्रान जगासमोर पुराव्यासहीत मारला.
अमेरिकेत 9/11 हल्ल्यांत जुळे टावर मातयेभरवण करपी अल- कायदा संघटणेचो म्होरको ओसामा- बीन- लादेनाक ताच्या पाकिस्तानांतल्या एबोटाबाद गांवांतल्या घरांत अमेरिकन नेवी सीलानी मारलो आनी कूड दर्यांत उडयली. त्या प्रसंगांचें चित्रीकरण राष्ट्राध्यक्ष बराक ओबामा आनी सेना कमांडर लायव पळयताले. उपरांत ताचो पूत हमजा बीन लादेन आनी नेतो आयमन अल- जवाहीरी हांकां अफगाणिस्तानांत ड्रोन हल्ल्यांत काबार केले. क्युबाचे राष्ट्राध्यक्ष फिडेल कॅस्ट्रोक मारपाचो कट अमेरिकेन शिजयिल्लो हे सिद्ध जालां. इराकचो सद्दाम हुसेन आनी लिबियाचो मुआम्मर गदाफी ह्या राष्ट्राध्यक्षांक मारून उडोवपाक अमेरिकेन हवाई हल्ले केल्ले. सुदैवान ते वाटवले. सार्वभौम देशांच्या राष्ट्राध्यक्षांक मारून उडोवपाचो यत्न करपी अमेरिका कॅनडांत एक शीख आंतकवाद्याच्या खुनाचे आरोप कॅनेडाचो वकिल जावन भारताचेर लायत चवकशे खातीर सहकार करचो असो समुपदेश खंयच्या तोंडान दिता तें कळना.
इयान फ्लेमिंगान जल्माक घाल्लें कल्पनीक पात्र जेम्स बॉण्ड 007 ह्या ब्रिटीश एमआय- 6 गुप्तहेर एजण्टाक मनशांक जिवे मारपाचें लायसन्स सिनेमांत दिल्लें आसलें तरी वास्तवांत एमआय-6 संघटणा एजण्टाक खून करपाची सवलत दिना. तरीय पूण लुमुंबाच्या खुनांत एमआय-6 एजण्ट वांटेकरी आशिल्लो हे आपल्याक त्या संघटणेच्या एजण्टान खुद्द सांगिल्ले असो गौप्यस्फोट ब्रिटनच्याच राजकारण्यान केल्लो. 2020 वर्सा मोहसीन फक्रेझादेह ह्या इराणी अण्वीक शास्त्रज्ञाचो खून एमआय- 6 एजण्टांनी केल्लो आनी उपरांत राजकी कारणांक लागून इस्रायलचे मोसाद संस्थेन तें आपल्या माथ्यार घेतलें अशें म्हणटात. गुप्त म्हायती साझी करपी फायव्ह- आयज ( Five eyes ) पंगडाचो अमेरिका, कॅनडा, ऑस्ट्रेलिया, न्यूझीलंड वांगडा ब्रिटन सभासद आसा.
कम्युनिश्ट सत्ता चीनची मिनिश्ट्री ऑफ स्टेट सॅक्युरीटी आनी रशियेची केजीबी आपल्या विरोधकांच्या देशांत, विदेशांत गुप्ततायेन खून करत आयल्यात. दुसऱ्या महायुद्धा उपरांत केजीबीचे लाखभर एजण्ट अमेरिकेंत गुप्तहेरी करताले. केजीबीन चेचन गणराज्याचे राष्ट्राध्यक्ष, सेना कमांडर, एमीर, नेते मेळून सुमारे 80 जाणांक मारून उडयल्यात. हालीं पुतिनाक आव्हान दिवपी वॉगनर खाजगी सेनेचो मुखेली सर्गेई प्रिगोशीन आनी तांच्या 8 कमांडरांक विमानांत स्फोट घडोवन मारून उडोवपाचो आरोप पुतिन आनी केजीबीचेर लागल्यात. चीनी एजन्सीन कितल्या विरोधकांक मारल्यात ताचो अधिकृत आंकडो मेळप कुस्तार पूण सीआयएच्या वीस एजण्टाक मारून उडयल्यात ताची खात्री जाल्या. अमेरिकेन बळिश्ट चीना लागी मात चवकशे खातीर गाराणें घालें ना.
“आतंकवादाक बळगें दिवपी देशां विरोधांतूच न्हय तर आतंकवादी कट कारस्थाना रचपी आतंकवादी व्यक्ती विरोधांतून देशाक स्वरक्षणा खातीर निर्णय घेवपाची मुभा संयुक्त राष्ट्रसंघाच्या चार्टराच्या कलम 51 खाला दिल्ली आसा” हे संयुक्त राष्ट्रांतले आमचे प्रतिनिधी नागराज काकानूर हांणी 2021 वर्सा सभेक जाणोवन दिलां. तेन्ना फुडारांत खलिस्तानी आतंकवादी सोंपयले जाल्यार वा 1993 मुंबई स्फोटांत 257 आनी 2008 हल्ल्यांत 175 नागरिकांच्या मरणाक जापसालदार दाउद इब्राहीम कासकराक आनी ताच्या डी-कंपनीच्या एजण्टांक आमी मारून उडयले जाल्यार तीं कृत्यां अमेरिकेन जशे तांच्या देशाचे आतंकवादी अल कायदा एजण्टाक सोंपयले त्या भशेन आमच्या देशाचे सुरक्षीततायेचे दृश्टीन स्वसंरक्षणा खातीर आमी उखलिल्लीं पावलां आसतलीं.
चीनान 1962 वर्सा अचकीत आमच्या देशाचेर हल्लो केलो तेन्ना शिमेचेर चीनी सैनीक जमावड्याची आमकां मातूय सुलूस लागूंक नाशिल्ली. शेजारी देशांतली सैनिकी, अर्थीक, शास्त्रीय आनी राजकी गुप्त म्हायती एकठांय करप, ताचें विश्लेशण करप आनी सरकाराक निती थारावपाक मजत करप ह्या उद्देशान प्रधानमंत्री इंदिरा गांधीच्या कार्यकाळांत 1968 वर्सा भारतीय गुप्तहेर संस्था ‘रॉ’ ची स्थापना जाल्ली. मुख्यत्वे चीन, पाकिस्तान, श्रीलंका, अफगाणिस्तान, म्यांमार, बांगलादेशांत रॉ कार्यरत आसता. रॉ आनी पाकिस्तानी गुप्तहेर संस्था आयएसआय गेल्लीं अनेक दशकां एकामेकां आड कारवायो करीत आसात. खलिस्तानी, काश्मिरी अलगाववादींक पाकिस्तानच्या पंजाब प्रांतांत प्रशिक्षण दितात त्या कारणान त्या भागांत रॉ नेटवर्क चड सक्रिय दवरिल्ले. पश्चिमी आशिया आनी उत्तर आफ्रिकेंतली म्हायती मेळोवपा खातीर तशेंच आपल्या एजण्टांक आतंकवाद विरोधी ट्रेनींग दिवपा खातीर मोसाद वांगडाय सहयोग केला अशे म्हणटात.
1997 वर्सा प्रधानमंत्री इंदर कुमार गुजरालान पाकिस्तानांत रॉच्यो गतिविधी थांबयिल्यो. उपरांत आयिल्ल्या प्रधानमंत्र्यानीय थंय रॉचें कामकाज सुरू करपाचे यत्न केले ना आनी ताचें लुकसण आमकां भोगचें पडिल्लें. हाका लागून मुंबई 26 नोव्हेंबर 2008 हल्ल्या संबदांतल्यो पाकिस्तानी आयएसआय आनी लश्कर- ए- तायबा आतंकवाद्यांच्यो हालचाली तयारी आमकां कळ्ळी ना आनी त्या हल्ल्यांत आमचे नागरीक, पुलीस सोंपले. हल्ल्या उपरांत प्रधानमंत्री आनी संरक्षण मंत्रालयान घेतिल्ले बसकेंत पाकव्याप्त कश्मिरच्या लश्कर-ए-तायबा आतंकवादी स्थळांचेर अचूक सर्जिकल स्ट्रायक करपाचें थारिल्लें तेन्ना थंय जमनीर रॉचे एजण्ट नाशिल्ल्यान आतंकी छावण्यांचे आक्षांश- रेखांश उपलब्ध ना हे रॉच्या प्रमुखाक सांगचें पडलें. हालीं भारतविरोधी कारवायो परदेशांत – चड करून कॅनडा, अमेरिका, ब्रिटनांत – स्थायीक अलगाववादी पंगडांनी वाडयल्यात. राजकी फायद्या खातीर व्यक्तिस्वातंत्र्याचें कारण दित त्या देशांतल्या सत्ताधिशांनी तांचे विशीं नमळाय दाखयतात. देशांत आतंक घडोवन हाडचे आदीं स्वरक्षणा खातीर हीं प्रकरणां मुळांतल्यान सोंपोवचे खातीर, हेर देश कितें म्हणटात ताचो विचार करनासतना, त्या देशांत गुप्तहेर संघटणांचो आंवाठ, वावर वाडोवन बळगें दिवप हालींच्या तेंपार चड आवश्यक जाल्लें आसा.

दीपक लाड
पर्वरी