भांगरभूंय | प्रतिनिधी
लग्नाचें हांयस दाखोवन केल्लो बलात्कार
पणजी: आरोपीन केल्लो गुन्यांव गंभीर आनी घृणास्पद आशिल्ल्याचें निरिक्षण नोंद करून लग्नाचें हांयस दाखोवन बायलेचेर बलात्कार केल्ल्या प्रकरणांत पणजेंतल्या जलदगती आनी पोक्सो न्यायालयान तिसवाडी म्हालांतल्या 32 वर्सां पिरायेच्या तरणाट्याक 10 वर्सांची खर बंदखण आनी 1 लाख रुपया दंडाची ख्यास्त दिल्या. हे विशींचो निवाडो न्या. दुर्गा मडकयकार हांणी दिलो.
ह्या प्रकरणांत पोरणें गोंय पुलिसांनी 8 फेब्रुवारी 2018 दिसा गुन्यांव दाखल केल्लो. ते प्रमाण पिडीत बायलेन कागाळ दाखल केल्ली. पिडीत बायलेचें कुटूंब 2007 वर्सा गोंयांत आयिल्लें आनी पोरण्या गोंया रावंक लागलें. त्याच वाठारांत आरोपी कांय अंतराचेर रावतालो. ताची ते बायलेची इश्टागत जाली.
2009 वर्सा आरोपीन पिडीत बायलेच्या कुटुंबा कडेन तिचे कडेन लग्न करपा खातीर मागणी घाली. ह्याच वेळार पिडीत बायल गोंयांत खाजगी कंपनींत काम करूंक लागली. उपरांत 2011 वर्सा पिडीत बायलेचें कुटूंब तिका गोंयांतूच सोडून आपल्या मूळ गांवां गेलें. मजगतीं पिडीत बायलेचें कुटूंब ज्या भाड्याचें कुडींत रावतालें, पिडीत बायल गोंयांत काम करीत आशिल्ल्यान ती कूड ते बायलेन घेतली आनी थंय ती एकटीच रावंक लागली. ह्या वेळार आरोपी केन्ना केन्ना तिचे कडेन वचून एकठांय रावंक लागलो.
मजगतीं, तांचें मदीं लिंगीक संबंद आयले. उपरांत 2017 वर्सा आरोपी लग्न करपाचें टाळत आशिल्ल्यान बायलेन आरोपीच्या कुटुंबांक हाची म्हायती दिवन आपूण लग्न करतलें अशें सांगलें. त्या वेळार आरोपीन तिचे कडेन लग्न करपाक न्हयकार दिलो, तशेंच आपूण आपल्या कुटुंबा आड वच्चो ना अशी म्हायती दिली. तशेंच तिचो फोटू व्हायरल करपाची धमकी दिवन तिचेर लिंगीक अत्याचार करूंक लागलो.
हाका बेजारून बायलेन 2018 वर्सा पोरणें गोंय पुलीस स्टेशनार कागाळ दाखल केली. हाची दखल घेवन तेन्नाचे पुलीस उपनिरिक्षक विजयकांत कवळेंकार हांणी आरोपी आड गुन्यांव दाखल करून 14 फेब्रुवारी 2018 दिसा अटक केली. उपरांत 17 फेब्रुवारी 2018 दिसा न्यायालयान आरोपीक जामिनाचेर सुटका केली. ह्या प्रकरणांत पुलिसांनी पिडीत बायलेची आनी आरोपीची वैजकी चांचणी आनी तपास पूर्ण करून 15 डिसेंबर 2018 दिसा न्यायालयांत आरोपपत्र दाखल केलें. उपरांत न्यायालयांत उलटतपासणी जाली तेन्ना पिडीत बायल विदेशांत नोकरे खातीर वचपाची आशिल्ल्यान तिणें खटलो सुरू दवरपाक न्हयकार दिल्ल्याची बाजू आरोपीच्या वकिलान मांडून आरोपांतल्यान सुटका करपाची मागणी केली.
मजगतीं, हें प्रकरण गंभीर आशिल्ल्यान न्यायालयान खटलो सुरूच दवरलो. न्यायालयान वैजकी अहवालाची तशेंच साक्षीदारांची दखल घेवन आरोपी आड सबळ पुरावे आशिल्ल्याचें निरिक्षण नोंद करून 3 फेब्रुवारी 2024 दिसा बलात्कार प्रकरणांत दोशी थारायलो. ह्या प्रकरणांत सरकारी वकील निता मराठे हांणी बाजू मांडली. उपरांत न्यायालयान वयलें निरिक्षण नोंद करून आरोपीक 10 वर्सांची खर बंदखण आनी 1 लाख रुपयांचो दंड दिलो. दंडाची रक्कम जमा केल्यार पिडीत बायलेक दिवपाचो आदेश न्यायालयान दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
