भांगरभूंय | प्रतिनिधी
मेक्सिको, खबरांसंस्था: मेक्सिकोंत ‘बर्ड फ्लू’क लागून पयलें मरण आयलां. हो संवसारांतलो पयलो मनीस बळी अशें म्हण्टात. संवसारीक भलायकी संघटणेन ही म्हायती दिल्या. बर्ड फ्लूचे दुयेंती वाडल्या उपरांत डब्ल्यूएचओन पुष्टी केल्लें हें पयलें मनशाचें मरण. मरण आयिल्ली बायल मेक्सिको रावपी आशिल्ली. संवसारभर हो व्हायरस व्हडा प्रमाणांत पातळ्ळा. फुडल्या कांय वर्सांनी चड लोकांक संसर्ग जावंक शकता, अशी शिटकावणी डब्ल्यूएचओन दिल्या. मेक्सिकोंत H5N1 बर्ड फ्लू जावन मनशाक मरण आयिल्ल्याची ही पयलीच घडणूक.
संवसारीक भलायकी संघटणेची शिटकावणी
डब्ल्यूएचओच्या म्हणण्या प्रमाण, ह्या दुयेंसाची लागण जावपाची पयली म्हायती २३ मे दिसा मेळ्ळी. ह्या मरणा संबंदीची म्हायती आनी ह्या रोगाचो मनशाचेर जावपी परिणामांची चवकशी सुरू आसा. पूण हे घडणुके उपरांत आतां संवसारीक भलायकी संघटना सादूर जाल्या. मेक्सिकन भलायकी अधिकार्यांच्या निवेदना प्रमाण मरण आयिल्ले बायलेक जोर, स्वास घेवपाक त्रास जावप, अतिसार, मळमळ आनी अस्वस्थताय अशीं लक्षणां दिसून आयिल्लीं अशें डब्ल्यूएचओन सांगलां. संवसारीक पांवड्यार हें पयलें मनशाचें मरण, तशेंच मेक्सिकोंतल्या मरण आयिल्ल्या मनशाक एव्हियन H5 व्हायरसाची लागण जावपाची ही पयली केस. मेक्सिकोंतल्या घडणुकेचो उल्लेख करून जागतीक भलायकी संघटणेन पयलेच खेपे २३ मे दिसा ही म्हायती मेळ्ळी अशें सांगलें. मेळिल्ले म्हायती प्रमाण बळीचो पोल्ट्री वा हेर जनावरां कडेन संपर्क नाशिल्लो. हाचो कसलोच इतिहास नाशिल्लो. मात तिका हेर रोगूय आशिल्ले आनी ताका लागून तिची स्थिती आनीक इबाडली.
बर्ड फ्लू व्हायरस शंबर पटीन बळिश्ट?
भलायकी अधिकार्यांच्या म्हणण्या प्रमाण ५९ वर्सां पिरायेचे बायलेक तीन सप्तकां खाटीर बसून एव्हियन फ्लूचीं खर लक्षणां दिसूंक लागलीं. तज्ञांनीय हाचे आदीं बर्ड फ्लूचे दुयेंती वाडत आशिल्ल्यान हुस्को उक्तायिल्लो आनी कोरोना परस १०० पटींनी चड बळिश्ट हो व्हायरस आसूं येता अशें सांगिल्लें.
बर्ड फ्लूचीं मुखेल लक्षणां
दोळे तांबडे जावप
जोर येवप
खोंकली मारप
ताळो दुखप
नाक व्हांवप
स्नायू वा कूड दुखप
तकली दुखप
थकिल्ले वरीं दिसप
श्वास घेवपाक आडखळ
अतिसार
धवळप
ओकूंक येवप
फीट येवप
बर्ड फ्लू पसून स्वताक कशें वाटायतलीं?
रान सवण्यां कडेन संपर्क दवचो न्हय.
आपली भोंवतण नितळ दवरात.
आपले हात उदकान आनी साबणान धुयात.
जेवण तयार करचे पयलीं वापरपी वस्तू उदकान धुयात.
जेवण वेवस्थीत शिजोवन खायात.
घरांतल्यान भायर सरतना मास्क घालात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
