भांगरभूंय | प्रतिनिधी
प्रसन्ना गांवस: वाळपय नव्या व्यायामशाळेचें उक्तावण
वाळपय: बदलते जिणेशैलीक लागून आपले भलायकेची जतनाय घेवप ही दरेकाची जापसालदारकी आा. आपल्या जेवणा-खाणांत सेगीत बदल जावंक लागल्यात. हाका लागून भलायकेचेर जावपी परिणाम आडावपाचे आसत जाल्यार सेगीत व्यायाम करप गरजेचें आसा. वाळपय पालिकेन आतां मेरेन भलायके विशीं विशेश योगदान दिलां अशें वाळपयच्यो नगराध्यक्षा प्रसन्ना गांवस हांणी सांगलें.
वाळपय पालिके वतीन कोट्यांनी रुपया खर्च करून बांदिल्ल्या व्यायाम शाळेचे उक्तावण नगराध्यक्षा प्रसन्ना गांवस हांचे हस्तुकीं जालें. फिटनेस क्लब हांच्या माध्यमांतल्यान ही व्यायाम शाळा सुरू केल्या हाचो फायदो व्हड प्रमाणांत लोकांनी घेवचो अशें आवाहनूय नगराध्यक्षांनी केलें.
वाळपय नगरपालिका मैदानाच्या शेजराच पालिके वतीन ही व्यायाम शाळा सुरू केल्या. ही व्यायाम शाळा नगरपालिकेन भाड्यान दिल्या. फिटनेस क्लब हांच्या माध्यमांतल्यान साईश गांवकार आनी लक्ष्मण दळवी हांचे वतीन ही व्यायाम शाळा चलयतले. सवाय दरांत ही व्यायाम शाळा संबंदितां खातीर उपलब्ध करतले अशें नगराध्यक्षांनी स्पश्ट केलें.
ह्या वेळार आयोजीत केल्ल्या उक्तावण सुवाळ्यांत नगरगांव पंचायतीच्यो आदल्यो उपसरपंच संध्या खाडीलकार, पालिकेचे नगरसेवक वसयुद्दीन सय्यद, साईश गांवकार, लक्ष्मण दळवी आनी हेरांची व्हड प्रमाणांत हाजेरी आशिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
