बटलराची निर्णायक खेळी

भांगरभूंय | प्रतिनिधी

राजस्थान रॉयल्सान इंडीयन प्रिमीयर लिगेचे (आयपीएल) 31वे मॅचींत येजमान कोलकाता नायट रायडर्साक 2 विकेटींनी हारयलो. कोलकातान दिल्ले 224 धांवड्यांचे मोखीचो फाटलाव राजस्थानान निमाण्या बॉलाचेर 2 विकेटी राखून केलो.

राजस्थानाच्या हातांतल्यान मॅच गेली अशें दिसता आसतना रॉव्हमेल पॉवेलाच्या आक्रमक बॅटिंगेन कोलकाताक बॅकफुटाचेर धुकल्लो. ते उपरांत जॉस बटलरान आक्रमक बॅटींग केली आनी 55 बॉलांनी शेंकडो पुर्ण करून मॅच सोंपयली. आयपीएलांतलो ताचो हो सातवो शेंकडो थारलो. ताणें क्रिस गेलाक (6) फाटीं घालो. राजस्थानाचे ह्या जैतान 12 गूण जाल्यात आनी ताणें गुणतकट्यांतली आपली पयली सुवात घटमूट केल्या.

मजगतीं, यशस्वी जयस्वाल (19) परतून अपेशी थारलो. दुसरे ओव्हरींत वैभव अरोरान ताका ट्रॅप करून बाद केलो. पांचवे ओव्हरींत हर्षित राणान मुखेली संजू सॅमसनाक (12) बाद केलो. इम्पॅक्ट प्लेयर जॉस बटलर आनी रियान पराग हांणी डाव सांबाळ्ळो. दोगांयनी 23 बॉलांनी अर्द शेंकड्याची भागिदारी पुर्ण केली. आठवे ओव्हरींत सको आनी चवको खाल्ल्या उपरांत हर्षितान बरी बॉलींग केली. ताणें रियानाक बाद केलो. रियानान 14 बॉलांनी चार चवके आनी दोन सक्यांचे मजतीन 34 धांवड्यो केल्यो. अंदूंच्या हंगामांत 300 परस चड धांवड्यो करपी विराट कोहली उपरांत दुसरो बॅट्समन थारलो. 9वे ओव्हरींत सुनील नरेनान राजस्थानाक चवथो धपको दितना ध्रुव जुरेलाक (2) बाद केलो.

रोव्हमन पॉवेल आनी शिमरोन हेटमायर हे दोन हिटर आसतना पंगड वेवस्थापनान आर आश्विनाक बॅटिंगेंत बडती दिली. ताका लागून तांच्या धांवड्यांचो वेग मंदावलो. आश्विनान 11 बॉलांनी 8 धांवड्यो केल्यो आनी बटलरा वांगडा मेळून ताणें 22 बॉलांनी 21 धांवड्यांची भागिदारी केली.

वरुण चक्रवर्तीन पयल्याच बॉलाचेर हेटमायराक (0) बाद करून कोलकाता व्हड येस मेळोवन दिलें. राजस्थानाक 36 बॉलांनी 96 धांवड्यांची गरज आशिल्ली. सगली भिस्त बटलराचेर आशिल्ली. ताणें 36 बॉलांनी अर्द शेंकडो नोंदयलो आनी 15वे ओव्हरींत 17 धांवड्यो केल्यो. 16वे ओव्हर घालपाक आंद्रे रसेल आयलो. ताचे ओव्हरींत 17 धांवड्यो आयल्यो.  रोव्हमॅनान 17वे ओव्हरींत सुनील नरेनाक एक चवको आनी दोन सके मारले. पूण, पांचव्या बॉलाचेर सुनीलान विकेट घेतली. रोव्हमॅनान 13 बॉलांनी एक चवको आनी तीन सक्यांचे मजतीन 26 धांवड्यो केल्यो. ताणें 19 बॉलांनी 46 धांवड्यो अशें मोखीचें अंतर उणें केलें. फुडल्या बॉलाचेर ट्रॅण्ट बोल्टाची कॅच सोडली. सुनीलान चार ओव्हरींनी 30 धांवड्यो दिवन 2 विकेटी घेतल्यो. मिचेल स्टार्कान 18वे ओव्हरींत 18 धांवड्यो दिल्यो आनी 12 बॉलांनी 28 धांवड्यो अशें समीकरण जालें. 19वे ओव्हरींत बटलरान 19 धांवड्यो केल्ल्यान मॅच राजस्थाना वटेन घुंवली. वरुण चक्रवर्तीच्या पयल्या बॉलाचेर सको मारल्या उपरांत बटलर तीन बॉल निर्धाव खेळ्ळो.  पांचव्या बॉलाचेर धांवड्यो घेतल्या उपरांत ताच्या पांयाक क्रॅम्प आयलो. एका बॉलान एक धांवडेची गरज आसतना बटलरान चवको मारून राजस्थानाक उमळशीक वाडोवपी जैत मेळोवन दिलें.

ते आदीं कोलकाताच्या इडन गार्डन्स मैदानाचेर परतून एकदा सुनील नरेनान आक्रमक बॅटींग केली. ताणें राजस्थान रॉयल्साच्या सगल्या बॉलरांची बॉलींग फोडून काडली. ताणें आयपीएलांत पयल्या शेंकड्याची नोंद केली आनी आयपीएलांत शेंकडो मारपी तो क्रिस गेल आनी लॅण्डल सिमन्सा उपरांत तिसरो कॅरिबीयन बॅट्समन थारलो.

ते पयलीं राजस्थान रॉयल्सान टॉस जिखून पयलीं कोलकाता नायट रायडर्साक बॅटींग करपाचें आमंत्रण दिलें. चवथ्याच बॉलाचेर आवेश खानान कोलकाता धपको दिलो. फिल सॉल्टाक (10) ताणें बाद केलो. पूण, सुनील नरेन आनी अंगकृष रघुवंशी हांणी 43 बॉलांनी 85 धांवड्यांची भागिदारी करून कोलकाताक 10.4 ओव्हरींनी 106 धांवड्यो करून दिल्यो. अखेरेक कुलदीप सेनान ही जोडी फोडली. ताणें अंगकृषाक बाद केलो. अंगकृषान 18 बॉलांनी पांच चवक्यांचे मजतीन 30 धांवड्यो करून कॅच बाद जालो. अंदूंच्या हंगामांत पयल्या 10 ओव्हरींनी 100 परस धांवड्यो करपाची कोलकाताची ही चवथी खेप आसा. ताणें सनरायझर्स हैदराबाद आनी मुंबय इंडियन्स ह्या पंगडांक फाटीं घाले. दोगांयनी 3-3 खेपे हो पराक्रम केल्लो.

मजगतीं, मुखेली श्रेयस अय्यर (11) युजवेंद्र चहलाच्या बॉलाचेर एलबीडब्ल्यू बाद जालो. दुसरे वटेन सुनील नरेनान आपली आक्रमक बॅटींग चालूच दवरिल्ली. दुसरे वटेच्यान आक्रमक बॅट्समन आंद्रे रसेल हो सुनील नरेनाची बॅटींग पळयत उबो आशिल्लो.

राजस्थान रॉयल्साचो येसस्वी बॉलर आर आश्विनान चार ओव्हरींनी 49 धांवड्यो दिल्यो. चहलान घाल्ले 16वे ओव्हरींत सुनील नरेनान दोन सके आनी दोन चवके मारून 49 बॉलांनी शेंकडो पुर्ण केलो. कोलकाता वतीन शेंकडो पुर्ण करपी सुनील नरेन तिसरो बॅट्समन थारलो. ताचे पयलीं ब्रॅण्डन मॅकुलमान (नाबाद 158) आनी वेंकटेश अय्यर (104) हांणी कोलकाता वतीन शेंकडे मारिल्ले.

स्ट्रॅटेजीक टायम आवटा उपरांत आंद्र रसेल (13) बाद जालो. आवेश खानान ताका तंबूंत धाडलो. अखेरेक 18वे ओव्हरींत ट्रॅण्ट बोल्टान उत्कृश्ट यॉर्कराचेर सुनील नरेनाक बोल्ड केलो. ताणें 56 बॉलांनी 13 चवके आनी 6 सक्यांचे मजतीन 109 धांवड्यो केल्यो.