भांगरभूंय | प्रतिनिधी
इंडीयन प्रिमीयर लिगेंत आयज येजमान राजस्थान रॉयल्स पंगड गुजरात टायटन्सा आड खेळटलो. दोनूय पंगडां मदीं अजून मेरेन पांच मॅची जाल्यात. गुजरातान चार जाल्यार राजस्थानान एक जिखल्या.
गुजरात टायटन्साचो फास्ट बॉलर मोहीत शर्मा अंदूं सेगीत पोरण्या बॉलान आनी डॅथ ओव्हरींनी बॉलींग करता. पूण, जॉस बटलरा आड ताचो रॅकॉर्ड पळोवन मुखेली शुभमन गील ताका नव्या बॉलान बॉलींग घालपाक दिवपाक शकता काय असो प्रस्न उप्रासता.
मोहीत शर्मान फाटले मॅचींत शेंकडो मारपी बटलराक तीन डावांनी दोन खेपे बाद केला. ताच्या आड बटलरान फकत 15.5चे सरासरीन धांवड्यो केल्यात. पूण, ताची स्ट्रायक रेट 206.66 इतकी आसा.
बटलरान फाटले मॅचींत शेंकडो मारून फॉर्मांत आयिल्ल्याचे संकेत दिल्यात. ताका लागून मोहीताक नवो बॉल हाताळपाक दिनासतना रावपाक शकता. पूण, गील आपलो सर्वोत्कृश्ट बॉलर राशीद खानाक पावरप्लेंत बॉलींग दिवपाक शकता. राशीदा आड बटलर संघर्श करता. ताची स्ट्रायक रेट राशीदा आड फकत 63.82 इतकी आसा. जाल्यार राशीदान ताका तीन खेपे बाद केला.
दुखापतीक लागून डॅव्हिड मिलर फाटल्या दोन मॅचींनी खेळूंक नाशिल्लो. पूण, आयचे मॅचींत ताची खेळपाची शक्यताय आसा. तो खेळटा जाल्यार युजवेंद्र चहला आड ताची बॅटींग पळोवपाक प्रेक्षक इत्सूक आसतले. मिलरान चहला आड 175चे स्ट्रायक रेटीन धांवड्यो केल्यात. पूण, चहलान ताका तीन खेपे बाद केला.
राजस्थानाचो मुखेली संजू सॅमसनान सुरवाती सावन आपलो फॉर्म कायम राखला. ताका लागून ताच्या कडल्यान लेगीत पंगडाक परतून बऱ्या खेळाची आस्त आसतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
