भांगरभूंय | प्रतिनिधी
23 ऑगस्टाक चरित्रांचें प्रकाशन
पणजी ः उत्तर भारतांतले पेशव्यांचे पराक्रमी सरदार महादजी शिंदे हांचे मुखेल सरसेनापती म्हणून पराक्रम गाजोवपी व्हड गोमंतकीय वीर आनी मुत्सद्दी बक्षीबहाद्दर जीवबादादा केरकार हांच्या पराक्रमाचो गोवा मराठी अकादमीन 117 वर्सां उपरांत परतून उगडास केला. बक्षीबहाद्दर जिवबादादा केरकार हांचे नरहर व्यंकाजी राजाध्यक्ष हांणी 1907 वर्सा बरयिल्लें विस्तारीत चरित्र अकादमी दोन खंडानी उजवाडावपाची आसा. नवप्रभाचे संपादक परेश प्रभू हांणी ह्या दोनूय खंडांचें संपादन केलां.
बक्षीबहाद्दर केरकार हांच्या 428 पानांच्या चरित्राच्या पयल्या खंडाचो प्रकाशन सुवाळो शुक्रारा 23 ऑगस्टाक बिहाराचे राज्यपाल राजेंद्र आर्लेकार हांचे हस्तुकीं सकाळीं 10.30 वरांचेर पेडणेच्या संत सोहिरोबानाथ सरकारी महाविद्यालयाच्या सभाघरांत घडोवन हाडटले. मूळ सुमार सशें पानांचें हें चरित्र दरेकीं चारशें परस चड पानांच्या दोन खंडांनी अकादेमी उजवाडायतली. पयल्या खंडात मूळ चरित्राचो भाग जाल्यार दुसऱ्या खंडांत तेन्नाचे पत्रवेव्हार, पोवाडे, बखरी आनी हेर पूरक म्हायतीचो आस्पाव जातलो.
ह्या सुवाळ्यांत श्री. आर्लेकार हांचे वांगडा संत सोहिरोबानाथ आंबिये सरकारी महाविद्यालयाची प्राचार्य डॉ. प्रवीणा केरकार, नवप्रभाचे संपादक परेश प्रभु, मराठी अकादेमी पेडणें प्रभागाचे अध्यक्ष चंद्रकांत सांगले हाजीर आसतले. अकादेमीचे अध्यक्ष अनिल सामंत हे कार्यावळीचे अध्यक्षपद सांबाळटले. सूत्रसंचालन गोविंद भगत करतले.
जिवबादादा केरकार
1740 वर्सा जल्मल्ले जिवबादादा हे महादजी शिंदे हांचे सरसेनापती. पानिपताच्या पराभवा उपरांत मराठेशाही परत गाजोवपी सरदारां मदीं तांचें नांव येता. दिल्लीच्या सिंहासनाचेर दुसर्या शाह आलमाक बसोवपाचे महादजी शिंदेंन स्विकारिल्ले कामगिरींत आनी शाह आलम बादशहाचे दोळे फोडपी गुलाम कादराक हारोवपाचे मोहिमेंत जिवबादादांचो सक्रिय वांटो आशिल्लो. दक्षीणेंत निझामां आडचे खर्ड्याचे नामनेचे लढायेंत जिवबादादान गाजयिल्लो पराक्रम इतिहासांत अमर जाला. पेशव्यांच्या दरबारांत ते वकील म्हूणय काम करताले.
ह्या चरित्रांत जिवबादादांचे चुलत भाव जगन्नाथ राम केरकार म्हणल्यार जगोबा बापू, बाळाजी राम ऊर्फ बाळाभाऊ बक्षी, जिवबादादांचे सख्खे भाव शिवबा नाना, महादजी शिंदे उपरांत तांच्या विधवांची बाजू घेतली म्हूण दौलतराव शिंदे हांणी आंगाक पेटते बाण लावन क्रूरपणान मारिल्ले जिवबादादांचे वीर पूत नारायणराव केरकार, ताचो भाव यशवंतराव, तशेंच मूळ पार्शेंचे आनी महादजी शिंदें कडेन काम करपी शूर गोंयकार समशेरजंग बहाद्दर लक्ष्मण अनंत उर्फ लखबादादा लाड, तांचे पूत आबाजी हांच्या कर्तृत्वाचो नियाळूय ह्या चरित्रांत घेतला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
