बकें आनी कोलो

भांगरभूंय | प्रतिनिधी

एका रानांत एक कोलो आनी ताचो घराबो रावतालो. तो खूब धूर्त आशिल्लो . एक दिस सदचेवरी शिंवान मेरूची शिकार केल्ली आनी ताचेर ताणें येतिश्ठ ताव मारलो . उरिल्लें मेरूक थंयच उडोवन तो आपल्या घोलींत न्हिदूंक गेलो. कोल्यान हेवटेन तेवटेन खावंक मेळटा काय म्हूण रान माडोवन काडलें . निमणें ताका तान लागली आनी तो झरी कडेन गेलो. उदक पिवन तकली वयर काडना फुडें पयस ताका एक शींग दिश्टी पडलें. पळयत जाल्यार ताका तें मेरू म्हूण कळ्ळें. आयतेंच सावद खावंक मेळलें म्हूण भकभकीत खावंक लागलो. खातां खातां एक बारकेलेंच हाड ताच्या ताळ्याक लागलें .
आड्डी मारत कोलो आकांतान हेवटेन तेवटेन धावंक लागलो . पूण कोणेच ताची वासपूस केली ना कोलो सामको फटींग म्हूण सगळ्यांक खबर आशिल्ली. म्हूण ताची काकुळट कोणाक दिसनाशिल्ली . चलत चलत तो शेतामेरेर पावलो. थंय एक बकें आपल्या पिलांक घेवन बशिल्लें . कांय दिसां पयलीं ताचो पांय जाळ्यांत आडखळून जखमी जाल्लो . ताच्यान पिलां खातीर खाण हाडूंक जायनासलें. तें दुखेस्त चेरो करून मेरेर बशिल्लें. कोल्यान म्हळें, म्हज्या ताळ्याक लागिल्लो कांटो काड. तूं सांगता तें काम करता. बक्यान म्हळें म्हजी पिलां खूब ल्हान आसात. तांकां खाण हाडून दिवंक म्हजे कडेन जायना. तूं जर म्हाका ताची वेवस्था करशीत जाल्यार तुजी हांव मजत करतां. कोल्यान रोखडीच उमेदीन शेपडी हालयली. हांव तुका मजत करता हाचें उतर दिलें.
बक्यान फाटलो फुडलो विचार करिनासतना ताच्या तोंडांतलें हाड ओडून काडलें. कोलो मात्सो जाम पडलो. शेता मेरेर ताका न्हिदयलो. चोचेन इल्लें करून उदक ताच्या तोंडान घालें. ताका कांय वेळान बरें दिसलें. बक्याची मात्शी आडनदर जायनाफुडें कोल्यान बक्याच्या पिलाक घांसाक घेतलें आनी थंयच्यान पळ काडलो. बकें जीवाच्या आकांतान रडपाक लागतकीच हेर बकीं चाळवलीं आनी तीं कोल्याच्या फाटींक लागलीं. बक्यान ताचे दोळ्याक चोंच मारली . कोल्यान सट्ट करून आड्डी मारून तोंडातलें पिलाक सोडलें. जिवाच्या आकांतान कोलो वाट मेळटा थंयच्यान पळत सुटलो. हेर बक्यांनी भियेल्ल्या बक्याच्या पिलाक आपल्या पांखापोंदा घेवन ऊब दिली आनी तागेल्या आवयच्या म्हऱ्यान व्हरून सोडलें.
( कोणाचेर चड विस्वास दवरप न्हय)

अलका सिनाय असोळडेकार
9822981107