भांगरभूंय | प्रतिनिधी
गांवडोंगरी आपेव्हाळ हांगासरली घडणूक
काणकोण: गांवडोगरी झिल्लावाडी आपेव्हाळ हांगा बंधाऱ्याचें काम सुरू आशिल्लें. बंधाऱ्याचें काम सुरू आसतना वयले वटेन आशिल्लें पालसण कोसळून तातूंत दोन कामगार आडकले. ही घडणूक आयतारा सांजवेळा 3.30 वरां मजगतीं घडली. मातयेच्या राशी पोंदा आडकल्ल्या कामगारांक जेसीबी मशिनाच्या आदारान भायर काडले. तातूंत पुरायपणान दबिल्ल्या राजेश सिंग हाका जाग्यारूच मरण आयलें. जाल्यार विशाल सिंग ह्या जखमी कामगाराचेर काणकोण हॉस्पिटलांत उपचार करून उपरांत मडगांवच्या जिल्हो हॉस्पिटलांत फुडल्या उपचारा खातीर धाडून दिलो.
जाल्यार मरण आयिल्लो राजेश हाची कूड मडगांवच्या जिल्हो हॉस्पिटलांत धाडून दिल्या. मरण आयिल्लो आनी जखमी जाल्लो हे दोगूय कामगार झारखंडचे आसात.
मेळिल्ले म्हायती प्रमाण 21 तारखेक ह्या बंधाऱ्याचें काम सुरू जाल्लें. काल आयताराय काम सुरू आसतना ही घडणूक घडली. झारखंडचे वट्ट 15 कामगार हांगा काम करतात. मयत राजेश सिंग हाचें एका वर्सा पयलीं लग्न जाल्लें, आनी ताची गुरवार बायल झारखंडांत आसा. हेर कुटूंब बंधाऱ्याच्या कामाचे सुवातेर रावतात. काणकोण पुलिसांनी घडणुकेचो पंचनामो केला आनी ते फुडलो तपास करतात.
मजगतीं, हे घडणुकेची खोलायेन चवकशी जावची अशी मागणी गांवडोंगरीचे सरपंच धिल्लन उर्फ यशवंत देसाय हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
