भांगरभूंय | प्रतिनिधी
कोलकाता, खबरां संस्था ः अस्तंत बंगालच्या बंदखणींतल्या बायलां कैदी विशीं कोलकत्ता उच्च न्यायालयान गंभीर हुस्को उक्तायला. खरें म्हणल्यार 2018 वर्सा बंदखणींत वाडत वचपी गर्देचेर न्यायालयानच कारवाय करून ह्या प्रकरणाची चवकशी अॅड. तपस कुमार भांजा हांचे कडेन सोंपयल्ली.
अस्तंत बंगालच्या बंदखणींत दवरिल्लीं बायल कैदी गुरवार जातात असो दावो करून अॅमिकस क्युरी हांणी बिरेस्तारा (8 फेब्रुवारी) उच्च न्यायालयांत आपलो अहवाल सादर केलो. तेच वेळार 196 भुरगींय वेगवेगळ्या बंदखणींत वाडत आसात. देखून दादल्या कर्मचाऱ्यांक बायलांच्या बॅरेकांत वचपाचेर बंदी घालची अशी तांणी सुचोवणी केली.
हे प्रकरणाची गंभीरताय मतींत दवरून मुखेल न्यायाधीश टी एस शिवगननम हांच्या फुडारपणा खाला आशिल्ल्या खंडपिठान खात्या कडेन वर्ग करपाचे आदेश दिले.
तशेंच सगल्या जिल्लो न्यायाधीशांनी आपल्या अधिकारक्षेत्रांतल्या सुधारगृहांक भेट दिवची जाका लागून कितल्यो बायल कैदी गुरवार जाल्यात तें कळूं शकतले अशेंय तपस कुमार हांणी 25 जानेवारीक बरयल्ल्या पत्रांतल्यान सुचयले. तशेंच बायलां कैदींक लैंगीक शोशण जावचो न्हय म्हणून सुधारगृहात धाडचे पयलीं गुरवारपणाची चांचणी करची असोय सल्लो तांणी दिला.
अस्तंत बंगालांतल्या बंदखणींतल्या कैद्यांची संख्या
अस्तंत बंगालांतल्या बंदखणींनी गर्दी धोक्याच्या पांवड्यार पाविल्ल्यान समस्या निर्माण जातात. नॅशनल क्रायम रेकॉर्ड ब्युरोन (एनसीआरबी) 2023 वर्सा उजवाडायल्ल्या अहवाला प्रमाण बंगालांतल्या बंदखणींत तांच्या क्षमताय परस 1.3 पटीन चड कैदी आसात.
जेल स्टॅटिस्टिक्स ऑफ इंडिया 2022 च्या अहवाला प्रमाण अस्तंत बंगालांतल्या बंदखणींत 19 हजार 556 दादले आनी 1 हजार 920 बायलां कैदी आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
