भांगरभूंय | प्रतिनिधी
लीग शिल्ड जैतिवंत मुंबय सिटी एफसीक इंडियन सुपर लिगेचे (आयएसएल) उपांत्य फेरयेच्या पयले लेग मॅचींत हार घेवची पडली. पुर्ण मॅचींत उत्कृश्ट खेळ करून लेगीत येजमान मुंबय सिटीक बंगळुरू एफसी आड गोल करपाक जमलो ना. दुसरे वटेन बदली खेळगडो म्हणून मैदानांत देंवपी सुनील छेत्रीन संदीचें भांगर केलें आनी बंगळुरूक एफसीक 78व्या मिनटाक आघाडी मेळोवन दिली. ह्याच नेटार बंगळुरू एफसीन सेगीत धावें जैत नोंदयलें. आतां उपांत्य फेरयेचे परतीची मॅच 12 मार्चाक बंगळुरू एफसीच्या मैदानाचेर जातली.
अंदूंच्या हंगामांत दोनूय पंगडांनी आतां मेरेन उत्कृश्ट प्रदर्शन केलां. दोनूय हे बळिश्ट पंगड एकामेका आड येवपाचे आशिल्ल्यान फुटबॉल मोग्यांची उत्सुकताय बरीच वाडिल्ली.
येजमान मुंबय सिटीन पयल्याच मिनटाक आक्रमण केलें. बिपिन सिंगाचो हो यत्न उण्या फरकान अपेशी थारलो. ग्रेग स्टिवर्टचो बंगळुरू एफसीच्या पॅनल्टी वाठारांत कुशळटाय खेळ तोखणाय करपा सारको आशिल्लो.
7व्या मिनटाक मुंबय सिटीच्या विघ्नेश दक्षिणमुर्तीन लेफ्ट फुटेट यत्न केलो. पूण, तो ऑफ टार्गेट उरलो. मुंबय सिटीन सातत्यान गोल करपाचो यत्न केलो. विघ्नेश, स्टिवर्ट, अपुया हांणी फिशालकायेन बॉल आपले कडेन दवरून बंगळुरू एफसीच्या खेळगड्यांक नाकापुरो केलें. 20व्या मिनटाक परेरा डियाझ हाणें हेडर वरवीं गोल करपाची संद वगडायली. पयल्या 20 मिनटांतली मुंबय सिटीक मेळिल्ली सोंपी संद आशिल्ली.
ग्रेग स्टिवर्टान दिल्ल्या पासाचेर परेरा डिआझाक फकत गोलकीपराक चकोवपाचें आशिल्लें. पूण, गुरप्रीत संधूचो गेम अॅव्हरनेस उत्कृश्ट आशिल्लो. ताणें मुखार येवन बॉल आडायलो. मुंबय सिटीन वगडायिल्ली ही सगल्यांत सोंपी संद आशिल्ली.
44व्या मिनटाक पुर्वा लचेंपान बंगळुरूचो ऑन टार्गेट यत्न फुकट घालयलो. पयल्या अर्दांत येजमान मुंबय सिटीन मॅचीचेर आपली पकड दवरिल्ली पळोवपाक मेळ्ळी. दोन सोंप्यो संदी वगडावंक नाशिल्लो जाल्यार मुंबय 2-0 असो मुखार आसतलो आशिल्लो.
मध्यांतरा उपरांत लेगीत मुंबय सिटीन आपलें आक्रमक कायम राखलें. 54व्या मिनटाक छांग्टेन सोंपी संद वगडायली. 58व्या मिनटाक बंगळुरून सुनील छेत्रीक मैदानांत देंवयलो. ताणें येना फुडें मुंबय सिटीच्या डिफॅण्डराचेर चेपण हाडपाक सुरवात केली. 62व्या मिनटाक झेवियर हर्नांडेसान ऑन टार्गेट यत्न मुंबय सिटीच्या गोलकीपरान आडायलो.
मुंबय सिटीचो खेळ उचेंल्या पांवड्या वयलो जालो. पूण, गोल करपाक ताका अपेस येतालें. 75व्या मिनटांच्या खेळांत ताका स कॉर्नर लेगीत मेळ्ळे. पूण, ताची पाटी कोरीच उरली. 77व्या मिनटाक प्रबीर दासान उत्कृश्ट यत्न केलो पूण, फुर्बा लचेंपान तितक्याच फिशालकायेन बॉल आडायलो. पूण, ते उपरांत मेळिल्ल्या कॉर्नराचेर सुनील छेत्रीन गोल केलो.
प्ले ऑफचे सेगीत दोन मॅचींनी छेत्रीन गोल केलो. बंगळुरून अंदूंच्या हंगामांत पयलो गोल करून 14तली 13वी मॅच जिखली आनी मुंबय सिटी खातीर हो हुस्को वाडोवपी गजाल आशिल्ली.
90+5 मिनटाक सुनील छेत्रीचो उत्कृश्ट यत्न फुर्बा लचेंपान आडायलो आनी बंगळुरूक 1-0 अशा गोल फरकान जैताचेर समाधान मानचें पडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
