भांगरभूंय | प्रतिनिधी
बायलांचे प्रिमियर लिगेंत काल गुजरात जायण्ट्सान रॉयल चॅलेंजर्स बंगळुरूक 11 धांवड्यांनी हारयलो. गुजरात जायण्ट्सान लिगेंतलें पयलें जैत जोडलें, जाल्यार बंगळुरून हारीची हॅट्रीक केली.
मुंबयच्या ब्रेबोर्न स्टेडियमाचेर टॉस जिखून बॅटींग करपाचो निर्णय घेवपी गुजरात जायण्ट्सान 20 ओव्हरींनी 7 विकेटी वगडावन 201 धांवड्यो केल्यो. ताका जाप दितना बंगळुरूक 20 ओव्हरींनी 6 विकेटी वगडावन 190 धांवड्यो करप शक्य जाल्यो.
बंगळुरूची हिथर नायटान 11 बॉलांनी नाबाद 30 धांवड्यो केल्यो. ओपनर सोफी डिव्हायनान सगल्यांत चड 66 धांवड्यो केल्यो. गुजराता वतीन अॅश्ले गार्डनरान तीन आनी एनाबेल सदरलॅण्डान दोन विकेटी घेतल्यो.
202 मोखीचो फाटलाव करपी रॉयल चॅलेंजर्स बंगळुरू वतीन मुखेली स्मृती मंधाना आनी सोफी डिव्हायन हांणी जलद सुरवात करून दिली. मुखेली मंधाना आनी सोफी हांणी अर्द शेंकड्यांची भागिदारी करून दिली. पूण, स्मृतीक बरे सुरवाती उपरांत ताचें व्हड खेळींत रुपांतर करपाक जमलें ना. ती सवे ओव्हरींत 18 धांवड्यो करून बाद जाली. ती बाद जाल्या उपरांत सोफी डिव्हायन हिणें एक बाजू सांबाळून धरतना गुजराताच्या बॉलरांक घाम काडलो. तिणें 45 बॉलांनी 66 धांवड्यो केल्यो. तिणें आठ चवके आनी दोन सके मारले.
एलीस पेरीन 25 बॉलांनी 32 धांवड्यो करून तिका बरी साथ दिवपाचो यत्न केलो. अखेरच्या ओव्हरींनी हैदर नायट आनी श्रेयांका पाटील हांणी आक्रमक बॅटींग करून बंगळुरूक मॅचींत हाडपाचो यत्न केलो. पूण, मोख मेळोवन दिवपाक तांकां अपेस आयलें.
गुजरात जायण्ट्सा वतीन अॅश्ले गार्डनान सगल्यांत चड तीन विकेटी घेतल्यो.
ते पयलीं टॉस जिखून पयलीं बॅटींग करपी गुजरातान 22 धांवड्यांचेर आपली पयली विकेट वगडायली. एस मेघना फकत आठ धांवड्यो करून बाद जाली. पूण, ओपनर ओपनर सोफिया डंकलीन आक्रमक बॅटींग करून 28 बॉलांनी 65 धांवड्यांची उत्कृश्ट खेळी केली. तिच्या अर्द शेंकड्यांचे खेळींत 11 चवके आनी तीन सक्यांचो आस्पाव आशिल्लो. तिच्या वांगडा खेळपी हरलीन देओलान लेगीत उत्कृश्ट खेळी करतना 45 बॉलांनी 67 धांवड्यो केल्यो. तिणें णव चवके आनी एक सको मारलो. ह्या दोगां खेरीत कोणाकूच व्हड केळी करपाक जमली ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
